თამარ რობაქიძე

თამარ რობაქიძე, ილიას სახელმწიფო უნივერსიტეტის პოლიტიკის მეცნიერების (ევროპისმცოდნეობა) მაგისტრატურის მე-2 კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

თამარი ერთი სემესტრი ზიგენის უნივერსიტეტის (გერმანია) საერთაშორისო ურთიერთობების ფაკულტეტზე ეუფლებოდა პროგრამას „გზა ევროპისკენ“.

მაგისტრატურის საფეხურზე სწავლა ილიას სახელმწიფო უნივერსიტეტში გადავწყვიტე და ნამდვილად არ ვნანობ არჩევანს, სხვაც რომ არაფერი, მან მომცა ზიგენის უნივერსიტეტში სწავლის შესაძლებლობა. თუმცა აქამდე მოსასვლელად ნამდვილად ბევრი ვიშრომე. თსუ-ში ბაკალავრიატის, თან პოლიტიკის მეცნიერების,  პროგრამაზე და მაღალი GPI-ის შენარჩუნება ადვილი საქმე არ არის. ამას დამატებული სტუდენტობისას კონფერენციებსა და პროექტებში მონაწილეობა… მოკლედ, საკმაოდ დატვირთული ვიყავი, თუმცა დამიფასდა.

ყველას, ვინც ამას კითხულობს, ვურჩევ, გამოიყენოს შანსი და წავიდეს გაცვლითი პროგრამით. დამიჯერეთ, ეს ერთ-ერთი დაუვიწყარი მოვლენა იქნება თქვენს ცხოვრებაში და მუდამ სიამოვნებით გაიხსენებთ. გაეცნობით ჩვენგან განსხვავებულ ცხოვრების წესს, ნახავთ ახალ ადგილებს, ხალხს, გაიჩენთ კარგ მეგობრებს და სასიამოვნოდ გაატარებთ დროს. იცხოვრებთ ევროპელი სტუდენტის ცხოვრებით და შეგეცვლებათ შეხედულებები ბევრ საკითხზე. ცხოვრებას უფრო ნათელი ფერებით დაინახავთ და მიეჩვევით დამოუკიდებლობას. იქ მხოლოდ საკუთარი თავის იმედი გაქვს და შენ იღებ ყოველგვარ გადაწყვეტილებას.

წადით და ბოლომდე გამოიყენეთ ეს შანსი!

გერმანიაში, ზიგენის უნივერსიტეტში, სწავლისას ჩემი სპეციალობის საგნები ავიღე და კურსი საკმაოდ კარგადაც დავხურე.  პროგრამამ საშუალება მომცა, დამენახა განსხვავება ჩვენსა და ევროპულ განათლებას შორის და მინდა ავღნიშნო, რომ სტილი და მიმართულებები ფაქტობრივად ერთნაირია. შეფასებები და კრიტერიუმებიც მსგავსი, უბრალოდ განსხვავდება სილაბუსები და პროფესორთა ლექციები, რაც ინდივიდუალურია და არ განისაზღვრება ქვეყნით.

#WeAreIliauni #ErasmusPlusISU

Share Button

მერი ყიფშიძე

ილიას სახელმწიფო უნივერსიტეტის ბიზნესის სკოლის მენეჯმენტის მიმართულების კურსდამთავრებული მერი ყიფშიძე თავისი გამოცდილების შესახებ გვიყვება:

ილიაუნში 2007 წელს ჩავირიცხე ბიზნესის ფაკულტეტზე, ბიზნესის ადმინისტრირების მენეჯმენტის მიმართულებით (დამატებითი სპეციალობა – ფრანგული ენა და ლიტერატურა). მაშინ ილიაუნი ჯერ კიდევ პედაგოგიურ ან უცხო ენათა ინსტიტუტის სახელით მოიხსენიებოდა. ამიტომ ჩემი არჩევანი, ერთი წლის დაარსებულ ფაკულტეტზე მესწავლა, ცოტა უცნაურად შეაფასეს ოჯახმა და ახლობლებმა. მე კი ვიცოდი, რომ თავისუფალი, პროგრესული, განვითარებადი უნივერსიტეტი ავირჩიე. სწავლის პროცესი ჩემთვის ძალიან დატვირთული იყო, არაჩვეულებრივი ლექტორებით, მიდგომებით, სიახლეებით. იმდენად საინტერესო იყო, დამატებით ლექციებსაც ვესწრებოდი. მივხვდი, რომ ასეთი დატვირთული რეჟიმის გამო სწავლასთან ერთად მუშაობას ვერ შევძლებდი და გადავწყვიტე, დრო მთლიანად სწავლისთვის დამეთმო. ვიყავი პრეზიდენტის სტიპენდიანტი და უნივერსიტეტი მაღალი GPI-ით დავამთავრე.

უნივერსიტეტის დამთავრების შემდეგ მივხვდი, რომ დასაქმება ქართულ ბაზარზე არც ისე მარტივი იყო, ის, რომ 20 წლისას დამსაქმებლები 5-10 წლიან გამოცდილებას გთხოვენ, სულაც არაა მითი. ავდექი და პირდაპირ დეკანს ვთხოვე სტაჟირება, როგორც წარმატებულმა კურსდამთავრებულმა. ერთ თვეში დამიბარა, აღმოჩნდა, რომ ხარისხის მართვის სამსახური სტაჟიორს ეძებდა. ასე დავბრუნდი უნივერსიტეტში, ამჯერად, როგორც თანამშრომელი. ხარისხის სამსახურში ერთთვიანი სტაჟირების შემდეგ ფაკულტეტების საინფორმაციო ცენტრს სჭირდებოდა დახმარება და ასე შემდეგ, დაახლოებით 6 თვეში რამდენიმე სხვადასხვა სტრუქტურა მოვიარე. შემდეგ, საპატიო მიზეზის გამო (დედა გავხვდი), ტაიმაუტის აღება მომიწია. 2012 წლის ოქტომბერში ბიუჯეტირებისა და ფინანსური ანალიზის სამსახურში (მაშინდელ საფინანსო დეპარტამენტში) თანამშრომლის წასვლის შემდეგ გამოჩნდა შტატი, დავიწყე მუშაობა და დღემდე მთავარ სპეციალისტად ვმუშაობ. ჩემს ფუნქციებში შედის უნივერსიტეტის ბიუჯეტის შედგენასა და კონტროლის პროცესში მონაწილეობა. განსაკუთრებით აქტიურად ვარ ჩართული საერთაშორისო და ადგილობრივი დონორი ორგანიზაციების მიერ დაფინანსებული პროექტების კუთხით, ვმონაწილეობ პროექტების ბიუჯეტის შედგენაში, შემდგომ კონტროლში და ამისთვის საჭირო (დონორ თუ მაკონტროლებელ) ორგანიზაციებთანაც მაქვს ურთიერთობა.

სტუდენტებს, და არა მარტო მათ, ვურჩევ, რაც შეიძლება მეტი დრო დაუთმონ სწავლას და თვითგანვითარებას. შესაძლოა, ახლა ფიქრობთ, რომ თეორიული ცოდნა არც ისე მნიშვნელოვანია, თუმცა ასე ნამდვილად არ არის. მიუხედავად იმისა, რომ თითქმის ყოველთვის იმის მაქსიმუმს ვაკეთებდი, რაც შემეძლო, ზოგჯერ ვნანობ, რომ მეტი არ ვისწავლე და ყველა შანსი არ გამოვიყენე. ილიაუნი გაძლევთ ბევრ შანსს და აუცილებლად ყველა გამოიყენეთ.

Share Button

ლაშა ხელაძე

ლაშა ხელაძე, ილიას სახელმწიფო უნივერსიტეტის მეცნიერებათა და ხელოვნების ფაკულტეტის პოლიტიკის მეცნიერებებისა და საერთაშორისო ურთიერთობების მიმართულების მაგისტრატურის მეორე კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

ლაშა ერთი სემესტრი ზალცბურგის უნივერსიტეტში (ავსტრია) სწავლობდა ევროკავშირისმცოდნეობის მიმართულებით.

მეგობრები მარადმწვანე სტუდენტს მეძახიან, რაც, ალბათ, ჩემი ხანგრძლივი ბაკალავრიატის დამსახურებაა – შავი ზღვის, ვენის უნივერსიტეტისა და თბილისის სახელმწიფო უნივერსიტეტებში მომთაბარეობის გამო. სტუდენტობა ალბათ ცხოვრების საუკეთესო პერიოდია და მაქსიმალურად ვცდილობ, გავიხანგრძლივო.

ვენიდან დაბრუნების შემდეგ დიდხანს ვუზიარებდი მეგობრებს შთაბეჭდილებებს, ისტორიებს, რის გამოც ხშირად სასაცილოც ვხდებოდი , ჰოდა, ზალცბურგში ყოფნისას მწერდნენ, ამოვიდა ვენა ყელში, ახლა ზალცბურგის ისტორიები ჩამოიტანეო. იმის თქმა მინდა, რომ შთაბეჭდილებებზე შემიძლია დიდხანს ვისაუბრო, თუმცა ვეცდები, საუკეთესოები შევარჩიო.
პირველ რიგში ევროკავშირისმცოდნეობის ცენტრ მონხსბერგზე, სად მოხვედრაც ორი გზით შეიძლება: ქვის დიდი კიბით, რომლის მოაჯირზეც გველის გამოსახულებაა და ასვლისას თავი სლიზერენის შეგირდი გგონია, და მთაში შეჭრილ გვირაბში არსებული ლიფტით. ყველაზე დიდი შოკი მაინც ზღაპრული ხედია, რომელიც, ერთი მხრივ, თუ მოტივაციაა სწავლისთვის, მეორე მხრივ, გირთულებს ლექციაზე კონცენტრაციას.
ზალცბურგის ზღაპრულ სილამაზეზე ბევრს არ ვიტყვი, მხოლოდ მეგობრებს გავიხსენებ. სტუდენტურ საცხოვრებლებში მიმოსვლა, საერთაშორისო ვახშმები პარასკევობით, ბილიარდი, მაგიდის ჩოგბურთი შაბათობით, ფართი და ცეკვები კვირაობით, სწორედ ის „ბენეფიტებია“, რომლებიც თუ არ მიიღე ერასმუსისგან, ჩათვალე, რომ სტიპენდია წყალში გადაყარე.
კინაღამ დამავიწყდა, იმისათვის, რომ ქალაქისგან სრული სიამოვნება მიიღო, აუცილებელია ველოსაპედი. ამ „აუცილებლობით“ ხშირად დავგორავდი ზემოთ ნახსენებ სამეგობროსთან ერთად ზალცბურგის სხვადასხვა ტბის მიმართულებით, რომლებიც ქალაქიდან დაახლოებით 30-40 კმ–ის რადიუსშია და იდეალურია Bike ტურისთვის.
მიუხედავად ასეთი მრავალფეროვანი სემესტრისა, შეგნებულად დავიტოვე რამდენიმე ადგილი სანახავად, რადგან ზალცბურგს რომ ემშვიდობები, საკუთარი თავისთვის უნდა გქონდეს სათქმელად: I’ll be back!

ზალცბურგის უნივერსიტეტის რეგულაციების გამო (პოლიტიკის მეცნიერების ბაკალავრი თუ არ ხარ, მაგისტრატურაზე ვერ გააგრძელებ სწავლას ამ მიმართულებით) ოფიციალურად ევროკავშირისმცოდნეობაზე ამოვყავი თავი, თუმცა არ ვყოფილვარ შეზღუდული პოლიტიკის მეცნიერებების საგნების არჩევაში. საბოლოოდ საინტერესო კურსები გამომივიდა, ორივე მიმართულებიდან –ევროინტეგრაციის თეორიები, ევროკავშირის ინსტიტუტები და პოლიტიკა, დემოკრატიზაცია, დიპლომატია და მოლაპარაკებები, სამხრეთ კავკასია რეგიონულ ჭრილში და კიდევ რამდენიმე საინტერესო კურსი, რომელიც კრედიტებში არ გადამიზრდია. გამოვყოფდი ევროკავშირის ინსტიტუტების კურსს, რადგან საშუალება მოგვეცა, წავსულიყავით ექსკურსიაზე და საკუთარი თვალით ვნახეთ ევროკავშირის მთავარი ინსტიტუტები: ცენტრალური ბანკი ფრანკფურტში, ევროსასამართლო ლუქსემბურგში და ევროპარლამენტი ბრიუსელში. ამასთან გვქონდა საინტერესო შეხვედრები ავსტრიის დიპლომატიურ წარმომადგენლობასთან და ევროპის საგარეო საქმეთა სამსახურში.

უცხოეთში მიღებული ცოდნა და გამოცდილება უნიკალურია და ბევრი მიმართულებით გამომადგება.

#WeAreIliauni #ErasmusPlusISU

 

 

 

Share Button

თამარ ქართველიშვილი

თამარ ქართველიშვილი, ილიას სახელმწიფო უნივერსიტეტის მეცნიერებათა და ხელოვნების ფაკულტეტის (რელიგიის კვლევების მიმართულების) მაგისტრანტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

თამარი ერთი სემესტრი ფრიდრიხ შილერის უნივერსიტეტის (იენი, გერმანია) – საერთაშორისო ურთიერთობების ფაკულტეტზე ეუფლებოდა პროგრამას „გზა ევროპისკენ“.

დასავლეთ საქართველოში, სამტრედიის სოფელ ნაბაკევში გავიზარდე. ბავშვობიდან აქტიური ვიყავი. მოსწავლეობისას თუ რამე პროექტი გამოჩნდებოდა, ყველაფერში ვმონაწილეობდი, ვცდილობდი, სხვადასხვა სფეროში მომესინჯა შესაძლებლობები. თუმცა განვიცდიდი, რომ ახალი, საინტერესო ინფორმაციის მიღება არცთუ ისე მარტივი იყო. სკოლა წარმატებით დავამთავრე და ჩავაბარე ილიას სახელმწიფო უნივერსიტეტში, რომელმაც შემცვალა – უფრო თავდაჯერებული გავხდი, ჩემს მსოფლმხედველობაზეც გავლენა მოახდინა. პირველი კურსიდან ჩავერთე სხვადასხვა აქტივობაში და, შეიძლება ითქვას, რამდენიმე კვირაში ბევრ საჭირო ინფორმაციას ვფლობდი. ხუთჯერ გავხდი პრეზიდენტის სტიპენდიატი. მეორე კურსიდან ვცდილობდი გაცვლით პროგრამებში მონაწილეობას, რადგან ეს ჩემი და ჩემი ოჯახის დიდი ოცნება იყო. ბევრი ცდისა და შრომის შედეგად მოვიპოვე ფრიდრიხ შილერის უნივერსიტეტში სწავლის უფლება და მართლაც ბევრი რამ შეიცვალა ჩემს ცხოვრებაში. დავიჯერე, რომ შრომისა და მონდომების შედეგად აუცილებლად შეიძლება მიზანს მიაღწიო.

ეს იყო ჩემი დიდი ოცნება. „იენა” ამ სიტყვის გაგონებაზე ახლაც ზუსტად ის ემოციები მეუფლება, რაც პირველად ამ ინფორმაციის გაგებისას დამეუფლა. შევხვდი საინტერესო ხალხს, საკუთარი თავი სხვა მხრიდან დავინახე, დამოუკიდებლობას მივეჩვიე… ამიტომ მინდა, ყველამ განიცადოს ეს ბედნიერება.

ბევრი სტუდენტი მონაწილეობაზე თავს იკავებს, რადგან ჰგონიათ, შესაბამისი კანდიდატურები არ არიან. წასვლა ხომ იმიტომ გვინდა, რომ ახალი ვისწავლოთ. ვერ წარმოიდგენთ, ეს როგორ შეცვლის თქვენს მსოფლმხედველობას. უფრო მეტად მიზანდასახული დავბრუნდი საქართველოში, იმ ზაფხულს ტალინის უნივერსიტეტის ორკვირიანი საზაფხულო სკოლის სტიპენდიაც მოვიპოვე. ერასმუსის პროგრამამ უფრო მონდომებული გამხადა. დავაფასე რა სწავლის ხარისხი გერმანიაში, ილიაუნის ბაკალავრიატის დასრულებისთანავე დავბრუნდი უკან au-pair პროგრამით, დავიწყე გერმანული ენის შესწავლა. წინ დიდი მიზნებისკენ!

გერმანიაში პოლიტიკის მეცნიერების მიმართულება ავირჩიე, რაც კიდევ ერთი გამოწვევა იყო ჩემთვის, რადგან ილიაუნიში სოციოლოგიის მიმართულებაზე ვსწავლობდი… სწავლის პროცესი იმაზე რთული აღმოჩნდა, ვიდრე წარმომედგინა. უცხო ენაზე სწავლისთვის საკუთარ თავზე დიდი მუშაობა დამჭირდა. საბოლოოდ 5 ნაშრომი დავწერე და კარგი ქულებიც ჩამოვიტანე იენის უნივერსიტეტიდან.

#WeAreIliauni #ErasmusPlusISU

Share Button

ნინო ფოფხაძე

ნინო ფოფხაძე, ილიას სახელმწიფო უნივერსიტეტის ბიზნესის ადმინისტრირების (მენეჯმენტი) მაგისტრატურის მეოთხე კურსის  სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

ნინო ერთი სემესტრი ვარშავის ეკონომიკური სკოლაში (პოლონეთი) ეუფლებოდა პროგრამას ბიზნესადმინისტრირების მიმართულებით.

PR მენეჯერი ვარ, ყოფილი ჟურნალისტი, რომელმაც გადაწყვიტა, ტექნიკურ საგნებშიც გამოეცადა თავი და ბაკალავრიატის დასრულებიდან საკმაო ხნის შემდეგ მაგისტრატურაზე ჩაბარება გადავწყვიტე. 90-იანი წლების შვილი ვარ, ასე რომ, ლამფის შუქი, მეცხრე ბლოკი და ამ წლებთან დაკავშირებული ყველაფერი გამოვიარე. სწორედ ამიტომ, ჩემთვის საზღვარგარეთ სწავლა აუხდენელ ოცნებას ჰგავდა. ბაკალავრიატის დასრულების შემდეგ სულ ისეთ გადატვირთული გრაფიკით ვმუშაობდი (რადიო, ტელევიზია, იუსტიციის სამინისტრო), არც მიცდია, ჩემი წილი „რკინის ფარდა” გამერღვია და ბედი მეცადა შორეულ და თან ასე ახლობელ ევროპაში. ილიაუნის სტუდენტი რომ გავხდი და სხვა ქვეყანაში სწავლის საშუალება მომეცა, თან ისეთ პრესტიჟულ უნივერსიტეტში, როგორიც SGH-ა, გადავწყვიტე, შანსი არ გამეშვა და მონაწილეობა მიმეღო პროგრამის შესარჩევ კონკურსში. როცა ბოლო ეტაპზე გადავედი და დამირეკეს, რომ დასტური მოვიდა მასპინძელი უნივერსიტეტიდან, ვერ ვიჯერებდი, სანამ ოფიციალური მოწვევა არ მივიღე. როცა ჩემმა კოორდინატორმა მითხრა, რომ მხოლოდ ერთი ადამიანი, მე შემარჩიეს, კიდევ ერთხელ მივხვდი, როგორ გამიმართლა, რომ სასწავლებლად ილიაუნი შევარჩიე.

ეს არის შანსი, რომელიც ყველამ უნდა გამოიყენოს, შანსი ცვლილებებისა და გამოწვევების, ახალ გარემოში ცხოვრების  და ამის არავის უნდა  შეეშინდეს. ყველაზე მთავარია, იყო ის, რაც ხარ, ნამდვილი. არასდროს დანებდე, უნდა ეცადო და ყველა მიზანს აუცილებლად მიაღწევ!

უცხოეთში ცხოვრება უპირველესად საინტერესო იყო კულტურული განსხვავების, ასევე სწავლის იქაური სტილისა და ენის გაუმჯობესების პერსპექტივის გამო. მეტი პასუხისმგებლობა გაქვს, რადგან ათასობით სტუდენტისთვის შენს ქვეყანას წარმოადგენ. ამიტომ უფლება არ გაქვს, კარგი არ იყო. მიღებულ ცოდნას, არა მხოლოდ თეორიულსა და პრაქტიკულს, არამედ ცხოვრებისეულს, მოვახმარ იმას, რომ ვიყო კონკურენტუნარიანი ჩემს საქმიანობაში, ვიყო უფრო მეტად პასუხსმგებლიანი მოქალაქე და, უბრალოდ, უკეთესი ადამიანი.

#WeAreIliauni #ErasmusPlusISU

Share Button

თამთა მურადაშვილი

ილიას სახელმწიფო უნივერსიტეტის მეცნიერებათა და ხელოვნების ფაკულტეტის გამოყენებითი ფსიქოლოგიის მიმართულების კურსდამთავრებული თამთა მურადაშვილი თავისი გამოცდილების შესახებ გვიყვება:

მიყვარს ილიას სახელმწიფო უნივერსიტეტში ჩემი მოხვედრის ისტორია. მაგისტრატურაზე სხვა უნივერსიტეტში ვსწავლობდი შრომისა და ორგანიზაციის ფსიქოლოგიას და სტაჟირებების მოძიებას ვცდილობდი. რადგან ბაკალავრზე სწავლისას ყოველთვის მხიბლავდა ილიაუნის კომპეტენტური თანამშრომლების კოორდინირებული მუშაობა, გადავწყვიტე, ბედი მეც მეცადა. ილიაუნის ვებგვერდზე მოვიძიე ადამიანური რესურსების მართვის სამსახურის უფროსის საკონტაქტო ინფორმაცია და ყოველგვარი ვაკანსიის არსებობის გარეშე გავუგზავნე მეილი, მივწერე, როგორ მინდოდა „საკმაოდ კარგი თეორიული ცოდნით, პატარ-პატარა გამოცდილებებით და მოტივაციის დიდი დოზით” მათ სამსახურში სტაჟირება. მარი ბურდულმა, HR-ის უფროსმა, იმ კვირაშივე დამიბარა გასაუბრებაზე. 3-თვიანი სტაჟირების შემდეგ გავხდი HR-ის და იმ საოცარი სივრცის თანამშრომელი, სადაც პირველივე დღიდან მხოლოდ სიყვარულს და დაფასებას ვიღებ. თამამად შემიძლია ვთქვა, რომ მარი ბურდულმა და ილიას სახელმწიფო უნივერსიტეტმა მომცა უდიდესი შანსი კომპეტენციების გამოვლენისა, რომლის გაღრმავებასაც ყოველდღე ვცდილობ.

სტუდენტებისთვის შესაძლოა ბუნდოვანი იყოს, რა ხდება იმ პატარა ოთახში, რასაც ადამიანური რესურსების მართვის სამსახური ჰქვია, რადგან არ გვაქვს მათთან სამსახურებრივად ურთიერთობა. ილიაუნის თანამშრომლებთან ხელშეკრულებების გაფორმება, მათთვის ცნობების, ბრძანებების მომზადება, კომპეტენციის ფარგლებში მათი დახმარება ყოველდღიურ საქმიანობაში, შიდასაუნივერსიტეტო კვლევების ჩატარება, თანამშრომელთან შესრულებული სამუშაოს შეფასებაში მონაწილეობა მცირე ნაწილია ილიაუნის ადამიანური რესურსების სამსახურის საქმიანობისა.

საქართველოში დასაქმება რთულია. სტუდენტობის დროს საკმაოდ დატვირთული გრაფიკით მიწევდა მუშაობა სწავლის საფასურის გადასახდელად. სანამ ილიაუნის გუნდის წევრი გავხვდებოდი, 3 წელი ვმუშაობდი მომსახურების სხვადასხვა სფეროში. წუთითაც არ მიფიქრია, რომ დროს ვკარგავდი, რადგან ყველანაირი საქმის შესრულებისას შეიძლება კომპეტენციების განვითარება. ჩემთვის, როგორც HR-ისთვის განსაკუთრებით მნიშვნელოვანი იყო სხვადასხვა კომპანიებთან თანამშრომლობა და მათი შიდა სამზარეულოს გაცნობა. ისეთ კონკურენტულ გარემოში გვიწევს გზის გაკაფვა, რომ სპეციალიზაცია მხოლოდ ერთი, ვიწრო, მიმართულებით შესაძლოა, არ იყოს კარიერული განვითარების გარანტი, განსაკუთრებით ადამიანური რესურსების მართვის სფეროში.

ხშირად მეკითხებიან, რა უნდა გავაკეთოთ წარმატების მისაღწევად. წარმატება ყოველთვის მოვა, როდესაც ადამიანს საკუთარი საქმე უყვარს. ამასთან მთავარია შრომა და მუდმივი ზრუნვა განვითარებისთვის. როდესაც იცი, რაც გინდა, მიზნისკენ სწრაფვა გაცილებით მარტივია. დაისახეთ მიზანი და მიჰყევით მას. არ აქვს მნიშვნელობა, გელოდებიან თუ არა, ყველგან შეაღეთ კარი. ყველაფერი შეგვიძლია ჩვენ, მოტივირებულ ადამიანებს. მოინდომეთ და იშრომეთ, წარმატება აუცილებლად მოვა.

Share Button

ელენე ანთია

ელენე ანთია, ილიას სახელმწიფო უნივერსიტეტის მეცნიერებათა და ხელოვნების ფაკულტეტის საერთაშორისო ურთიერთობების  მიმართულების მაგისტრატურის მეორე კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

ელენე  ერთი სემესტრი ზიგენის უნივერსიტეტში (გერმანია) ეუფლებოდა პროგრამას Roads to Democracy(ies)-ის მიმართულებით.

ჩემთვის უცხოეთში განათლების მიღება ყოველთვის პროფესიულ  ზრდასა  და განვითარებულ, განსხვავებულ საგანმანათლებლო სისტემასთან ასოცირდებოდა, ამიტომ  საზღვარგარეთ სწავლა ცხოვრების მიზნად ვაქციე, რომელიც ბაკალავრიატის ეტაპზე  ირანში  მოკლევადიანი საგანმანათლებლო პროგრამით დაიწყო,  სამაგისტრო საფეხურზე კი ERASMUS +-ის საშუალებით  ერთი სემესტრის განმავლობაში გერმანიაში ევროპული სტანდარტების განათლების მიღებით გაგრძელდა.

საზღვარგარეთ სწავლა, ცოდნის შეძენასთან ერთად  საუკეთესო საშუალება იყო ერთდროულად ახალი  ცხოვრების რიტმში ჩასართავად, უცხო ქვეყნის კულტურის გასაცნობად და  დასავლური სტანდარტების აკადემიური განათლების მისაღებად. ზიგენის უნივერსიტეტში გატარებული დრო ძალიან საინტერესო და ნაყოფიერი იყო პროფესიული თუ პიროვნული უნარების განვითარების მხრივ.

ევროპაში სწავლა  არცთუ ისეთი იაფი სიამოვნებაა, თუმცა სხვადასხვა სახის სტიპენდიები სტუდენტებს აძლევს შანსს, განათლება სრულიად უსასყიდლოდ მიიღონ და დამატებით ყოველთვიური სტიპენდიაც  დაიმსახურონ. დასავლური განათლება ნამდვილად უფრო მეტად არის ორიენტირებული დამსაქმებლების მოთხოვნებზე – თანამედროვე და პრაქტიკულია. ამასთან ყველაზე სანდო ინვესტიციაა, რომელსაც   საკუთარ მომავალში დებ.
Road to democracies, რომელზეც მობილობის ფარგლებში ვსწავლობდი,  საერთაშორისო, ინტერდისციპლინური და კვლევაზე ორიენტირებული  სამაგისტრო პროგრამაა. ისტორიის, პოლიტიკისა და სოციოლოგიის მეთოდებისა და მიდგომების შერწყმით პროგრამა მიზნად ისახავს, სტუდენტებს მისცეს ცოდნა ამ მიმართულებით, რომელიც  მათ მომავალში დემოკრატიის განსავითარებლად კონკრეტული სტრატეგიების შემუშავებაში დაეხმარება. ჩვენი ქვეყანა დემოკრატიზაციის გზაზე დგას, ამდენად სხვადასხვა კურსის ფარგლებში გავლილი თეორიული მასალის ქართულ რეალობაზე მორგება ძალიან საინტერესო აღმოჩნდა. ვფიქრობ, მიღებული ცოდნის გამოყენებით მცირედი  წვლილის შეტანას ჩვენც შევძლებთ დემოკრატიული სახელმწიფოს მშენებლობაში.

ამდენად Erasmus+  ნამდვილად  ერთ-ერთი საუკეთესო  შანსია მათთვის, ვისაც   დასავლური სტანდარტების განათლების  მიღება სურს.

#WeAreIliauni #ErasmusPlusISU

Share Button

ანუკი ჯუღელი

ილიას სახელმწიფო უნივერსიტეტის ბიზნესის სკოლის მენეჯმენტის მიმართულების კურსდამთავრებული ანუკი ჯუღელი თავისი გამოცდილების შესახებ გვიყვება:

სტუდენტობის პერიოდი არის საუკეთესო დრო, როდესაც შესაძლებლობა გაქვს, საკუთარი თავი ბევრ სხვადასხვა სფეროში გამოსცადო ტრენინგების, პრაქტიკებისა და სტაჟირებების საშუალებით და საბოლოოდ იპოვო ადგილი, რომლის ნაწილადაც იგრძნობ თავს და ყოველ დღეს მიუძღვნი სასიამოვნო საქმის კეთებას და საკუთარი თავის რეალიზებას.

ბაკალავრის საფეხურზე ვსწავლობდი ბიზნესისა და ეკონომიკის ფაკულტეტის ტურიზმის მოდულზე და ვმუშაობდი, როგორც ტურისტულ სააგენტოში, ასევე სასტუმრო „მერიოტში“, სადაც, ვთვლი, რომ დიდი ცოდნა და გამოცდილება მივიღე. ამავდროულად ჩართული ვიყავი ევროკავშირის მიერ დაფინანსებულ ახალგაზრდულ გაცვლით პროგრამებში – „Youth in action“, რომლებიც ესპანურ და ინგლისურ ენებზე ტარდებოდა.

მაგისტრატურის გაგრძელება ილიას უნივერსიტეტში, ბიზნესადმინისტრირების ფაკულტეტზე მენეჯმენტის მოდულით გადავწყვიტე და ვფიქრობ, ეს ერთ-ერთი საუკეთესო გადაწყვეტილება იყო, რადგან ამ უნივერსიტეტში ვხედავდი განვითარების, წინსვლის, გამოცდილებისა და ცოდნის მიღების მეტ შესაძლებლობებს. მაგისტრატურაში მივიღე მნიშვნელოვანი თეორიული და პრაქტიკული ცოდნა. სალექციო კურსი საკმაოდ საინტერესო და სიახლეებით დატვირთული იყო; გარდა ამისა, პროექტებზე მუშაობისას ვსწავლობდით ისეთ პროგრამებს, რომლებიც უკვე არაერთხელ გამომადგა ჩემს საქმიანობაში.

რაც ილიას უნივერსიტეტის გუნდის ნაწილი ვარ, არაერთ პროექტში მიმიღია მონაწილეობა. ვმუშაობ უნივერსიტეტის მატერიალური რესურსების სამსახურში, გასულ თვეებში პარალელურად ვმუშაობდი მენეჯერ-კოორდინატორად ფონდ „ღია საზოგადოება ინსტიტუტისა“ (OSF) და ილიას უნივერსიტეტის ერთობლივ პროექტზე. ასევე ორჯერ გავიმარჯვე Erasmus Staff Mobilty-ის პროექტის ფარგლებში და მობილობით ვიყავი ვარშავის ეკონომიკურ სკოლასა (SGH Warsaw School of Economics) და ესპანეთის კასტილია ლა მანჩის უნივერსიტეტში (Universidad de Castilla La Mancha).

ვფიქრობ, ამ შესაძლებლობებმა, რაც უნივერსიტეტმა მომცა, ძალიან დიდი როლი შეასრულა ჩემს როგორც პიროვნულ, ასევე კარიერულ განვითარებაზე. განსაკუთრებით გაცვლითი პროგრამები წარმოადგენს ახალ გამოწვევებსა და სირთულეებს, ბევრ საინტერესო და სიახლეებით სავსე დღეებს. ევროპის უნივერსიტეტებში მობილობა მნიშვნელოვანი წინ გადადგმული ნაბიჯია, რადგან ქვეყნის გაცნობასთან ერთად საშუალებას გაძლევს, გაეცნო საუკეთესო უნივერსიტეტების სწავლებისა და მუშაობის სტანდარტებს, სპეციფიკას, ინოვაციურ მიდგომებს და, შესაბამისად, გაუზიარო ინფორმაცია შენი უნივერსიტეტის საქმიანობის შესახებ.  ჩემთვის ილიას უნივერსიტეტი ერთი დიდი ოჯახია, იმ ხალხით სავსე, ვისი იმედიც ყოველთვის შემიძლია მქონდეს.

სტუდენტებს, რომლებიც ახლა დგამენ პირველ ნაბიჯებს, ვურჩევ, ცხოვრების ყველა ეტაპზე მიიღონ მეტი ცოდნა და გამოცდილება და შეეცადონ მათ მაქსიმალურად გამოყენებას. ვფიქრობ, მონდომება ყველაზე მნიშვნელოვანია ყველანაირ საქმიანობაში, რადგან მოტივირებული ადამიანი ყოველთვის მაქსიმალურს აკეთებს დასახული მიზნის მისაღწევად.

Share Button

ნათია გუჩუა

ილიას სახელმწიფო უნივერსიტეტის ბიზნესის სკოლის კურსდამთავრებული ნათია გუჩუა თავისი გამოცდილების შესახებ გვიყვება:

2010 წელს ილიას სახელმწიფო უნივერსიტეტი ავირჩიე და ბიზნესის ადმინისტრირების ფაკულტეტზე ჩავირიცხე. სწორედ ამ გადაწყვეტილებიდან დაიწყო ჩემი საინტერესო სტუდენტური ცხოვრება ილიაუნისთან ერთად.

სწავლისა და სტუდენტური ცხოვრების გარდა ვცდილობდი, მემუშავა და მიღებული ცოდნა პრაქტიკაში გამომეყენებინა. რამდენიმე სამსახური და თანამდებობა გამოვიცვალე, თუმცა ახალი, საინტერესო გარემოს, უნივერსიტეტის ღირებულებებისა და ღონისძიებების გამო, რასაც ილიაუნი გვთავაზობდა ჩვენ, თითოეულ სტუდენტს, დიდი ინტერესი და სურვილი გამიჩნდა, გავმხდარიყავი იმ დიდი, შეკრული, ოჯახის წევრი, რომელსაც ილიაუნი ერქვა, და ჩემი წვლილიც შემეტანა მის საქმიანობაში.

უნივერსიტეტის წარმატებით დასრულებამ და ჩემმა აკადემიურმა მოსწრებამ შესაძლებლობა მომცა, საჯარო ბიუროს სტაჟირების პროგრამით მომხვდარიყავი ილიაუნის „შიდა სამზარეულოში“ – ადამიანური რესურსების მართვის სამსახურში სტაჟირებაზე. ჩემი უშუალო უფროსის, თანამშრომლებისა და უნივერსიტეტის დახმარებით 3 თვის განმავლობაში განვვითარდი და დღეს უკვე ადმინისტრაციის წევრი ვარ.

მეოთხე წელია ჩემს გუნდთან ერთად უზრუნველვყოფ ადამიანური რესურსების მართვის სამსახურის საქმიანობის შეუფერხებლივ წარმართვას – ვეხმარებით აკადემიურ და ადმინისტრაციულ პერსონალს, კომუნიკაციას ვახორციელებთ უნივერსიტეტის შიდა სტრუქტურულ ერთეულებთან, ხელს ვუწყობთ უნივერსიტეტის თანამშრომელთა მოტივაციას, ახალი კადრების მოძიებასა და დასაქმებას, სხვადასხვა ხასიათის კორესპოდენციის მომზადებას, რის გამოც ჩემი სამსახური მრავალფეროვანი და სასიამოვნოა.

მიხარია იმ გარემოში მუშაობა, სადაც შენი თანაკურსელები უკვე შენი თანამშრომლები არიან და არა უბრალოდ მეგობრები. ეს ნათელი მაგალითია იმისა, რომ ილიას სახელმწიფო უნივერსიტეტი ბოლომდე უჭერს მხარს თავის სტუდენტებს და აძლევს მათ დასაქმებისა და განვითარების შესაძლებლობას, რაც ნამდვილად დასაფასებელია.

სტუდენტებს ვურჩევ, რაც შეიძლება აქტიურად იყვნენ ჩართულები სტუდენტურ ცხოვრებაში, მეტი დრო დაუთმონ სწავლას, თვითგანვითარებას და გამოიყენონ უნივერსიტეტის მიერ შეთავაზებული ნებისმიერი შესაძლებლობა, რადგან ეს პატარ-პატარა შესაძლებლობები დიდი ნაბიჯია წარმატებული კარიერისა და ცხოვრების შესაქმნელად, „ვისაც ძალიან უნდა მაღლა ასვლა, ის კიბესაც გამოიგონებს“, გამოგონების საშუალებას კი ილიაუნი ნამდვილად გაძლევთ.

#WeAreIliauni #ISUCareers #ISUSuccessStories

Share Button

მაგდა ელისაშვილი

მაგდა ელისაშვილი, ილიას სახელმწიფო უნივერსიტეტის ბიზნესის სკოლის მე-3 კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

მაგდა ერთი სემესტრით ლიმერიკის უნივერისტეტში (ირლანდია) – ბიზნესის ადმინისტრირების ფაკულტეტზე სწავლობდა. აღნიშნულ უნივერსიტეტში სწავლისას მან სტუდენტთა შორის ყველაზე მაღალი აკადემიური მოსწრება აჩვენა.

თამამად შემიძლია ვთქვა რომ სკოლაშივე აქტიურად ვმონაწილეობდი სხვადასხვა საგანმანათლებლო პროექტში. წარმატებისა თუ მარცხის მიუხედავად, ვსწავლობდი მთავარს, რომ სიახლეებისა და გამოწვევების არ უნდა გვეშინოდეს. ძალიან მინდოდა, ერასმუსელი გავმხდარიყავი. ილიაუნიც სწორედ ამიტომ ავირჩიე, უნივერსიტეტი, რომელიც ევროპის საუკეთესო უნივერსიტეტებში განათლების მიღების საშუალებას გაძლევს. მიზნის მისაღწევად ვეცადე აქტიური სტუდენტი ვყოფილიყავი, მაღალი აკადემიური მოსწრების გამო ოთხჯერ მოვიპოვე სახელმწიფო სტიპენდია. ასევე, არაფორმალური განათლების მისაღებად, ვმონაწილეობ სხვადასხვა პროექტში. ევროკავშირის მიერ დაფინანსებული ერთ-ერთი პროექტის ფარგლებში გავხდი ელჩი საქართველოში სიძულვილის ენის წინააღმდეგ.

ირლანდიაში გატარებული 4 თვე ჩემთვის ასოცირდება დამოუკიდებლობასთან, პიროვნულ და პროფესიულ ზრდასთან, სირთულეების გადალახვასა და უნივერსიტეტთან, რომელიც აერთიანებს სტუდენტებს მსოფლიოს სხვადასხვა ქვეყნიდან. ვისურვებდი, რომ ყველა სტუდენტს ჰქონდეს მსგავსი გამოცდილების მიღების შესაძლებლობა.

ლიმერიკის უნივერსიტეტი გამოირჩევა საგნების მრავალფეროვნებით, რამაც საშუალება მომცა, ბიზნესის ადმინისტრირებისა და ეკონომიკის სხვადასხვა სფეროს გავცნობოდი. თითოეული საგანი მოიცავდა როგორც ინდივიდუალურ, ასევე ჯგუფურ პროექტებს. ამ პროექტების ფარგლებში გავიცანი საინტერესო ადამიანები განსხვავებული შეხედულებებითა და გამოცდილებით. რამდენადაც რთული იყო სრულიად განსხვავებულ გარემოში სწავლა და ცხოვრება, ორმაგად სასიამოვნოა იმის განცდა, რომ დასახულ მიზანს მიაღწიე და მზად ხარ ახალი გამოწვევებისთვის.

#WeAreIliauni #ErasmusPlusISU

Share Button