ელენა ქერდიყოშვილი

ილიას სახელმწიფო უნივერსიტეტის მეცნიერებათა და ხელოვნების ფაკულტეტის სოციოლოგიის მიმართულების მეოთხე კურსის სტუდენტი ელენა ქერდიყოშვილი თავისი გამოცდილების შესახებ გვიყვება:

ამჟამად, სამუშაო ბაზარზე არსებული ვითარებიდან გამომდინარე, სამსახურის დაწყება სტუდენტებისთვის გარკვეულ სირთულეებთან არის დაკავშირებული. სწორედ ამიტომ ვფიქრობ, ამ საქმეში სტუდენტებისთვის ძალიან მნიშვნელოვანია მონდომება, ცნობისმოყვარეობა და მიზანდასახულობა.

ილიას სახელწიფო უნივერსიტეტმა, უფრო კონკრეტულად კი ილიას სახელმწიფო უნივერსიტეტის ნიდერლანდურმა ცენტრმა, მომცა ისეთი უნარების განვითარების შესაძლებლობა, არა მარტო აკადემიურ სივრცეში, არამედ ცხოვრებაშიც რომ ძალიან გამოსადეგია.  ცენტრში სწავლის დაწყების პირველ წელსვე მოვიპოვე ბელგიურ-ნიდერლანდურენოვანი ორგანიზაციის Orde van den Prince-ს სტიპენდია და საშუალება მომეცა, სტაჟირება გამევლო ბელგიის ქალაქ ოსტენდეს მერიასა და ბრიუგეს წიგნის მაღაზიაში. სხვადასხვა ქვეყნებში გამართულმა ენის კონფერენციები და საზაფხულო სკოლები ძალიან დამეხმარა ენის შესწავლაში, თანაც ავთენტურ გარემოში. ძალიან მიხარია, რომ ახლა უკვე შემიძლია მიღებული ცოდნის პრაქტიკაში გამოყენება.

ამჟამად ვთანამშრომლობ ერთ ნიდერლანდურ ორგანიზაციასთან, რომელიც სამედიცინო ტურიზმითაა დაკავებული და ლექციების პარალელურად ვითავსებ ერთ-ერთ კლინიკაში ნიდერლანდურენოვანი თარჯიმნისა და გიდის ფუნქციებს.

თარჯიმანსა და გიდს სჭირდება მოქნილობა, სისხარტე და მულტიკულტურულ გარემოში მუშაობის უნარი. ჩემთვის განსაკუთრებით სასიამოვნოა განსხვავებული სოციო-კულტურული ბექგრაუნდის ადამიანებთან შეხვედრა, მათი სიხარულისა და ემოციების გაზიარება, როცა უკვე გამომჯობინებულები თავიანთ ქვეყნებში ბრუნდებიან.

სტუდენტებს ვურჩევ, მაქსიმალურად გამოიყენონ ის რესურსები, რასაც მათ აკადემიური სივრცე სთავაზობს. ამ შემთხვევაში მათი პერსპექტივები შრომის ბაზარზე (და არა მარტო) აუცილებლად გაიზრდება.

 

Share Button

მარიამ ფედროვი

ილიას სახელმწიფო უნივერსიტეტის მეცნიერებათა და ხელოვნების ფაკულტეტის სოციალური მეცნიერებების ფსიქოლოგიასა და ლიტერატურატმცოდნეობის მიმართულების კურსდამთავრებული მარიამ ფედროვი თავისი გამოცდილების შესახებ გვიყვება:

დამამთავრებელი კურსის სტუდენტისთვის ანაზღაურებადი სტაჟირების პროგრამის შეთავაზება ყველაზე სწორი და ლოგიკური ნაბიჯია უნივერსიტეტის მხრიდან.  მე ახლა ილიას სახელმწიფო უნივერსიტეტში საბიბლიოთეკო მომსახურების განყოფილების უფროს სპეციალისტად ვმუშაობ. ამ ვაკანსიის შესახებ UNIJOBS-იდან შევიტყვე და საკმაოდ დიდი და სამართლიანი კონკურსის შედეგად მოვხვდი გუნდში, რომელიც უნივერსიტეტის ერთ-ერთი ყველაზე აქტიური, ენერგიული  და დინამიური სამსახურია.

წარმოიდგინეთ პროცესი, როდესაც სამუშაო კვირის განმავლობაში ათასობით სტუდენტთან გაქვს ურთიერთობა. ილიაუნის ბიბლიოთეკაში ატარებენ სტუდენტები  თავისუფალი დროის უმეტეს ნაწილს. ინდივიდუალური კონსულტაციები საჭირო ლიტერატურის მოძიებისთვის, რომლისთვისაც ისინი ყოველდღიურად მომმართავენ, მთლიანად მათ საჭიროებებზე, სასწავლო პროცესში მაქსიმალურად მარტივად, სწრაფად და ხარისხიანად ჩართვაზეა ორიენტირებული.

შემთხვევით არ აღვნიშნე ანაზღაურებადი სტაჟირება, რომელიც აუცილებელი პრაქტიკაა დამსაქმებლის მხრიდან. ყველა სტუდენტისთვის უნდა მოიძებნოს პლატფორმა, რომელიც, საწყის ეტაპზე,  საჭირო გამოცდილებებების დააგროვებაში დაეხმარება. აქ მიღებული გამოცდილების გამოა, სხვადასხვა პოზიციასა და საქმიანობაში თავს კიდევ უფრო თავდაჯერებულად რომ ვგრძნობ, ერთ-ერთი მიზეზი ისიცაა, რომ ილიაუნი ხარისხთან ასოცირდება. 2017 წელს  რამდენიმე საინტერესო პროექტში მივიღე მონაწილეობა. ეს მთლიანად მოქნილი სამუშაო გრაფიკისა და კარიერული თუ ინტერესების მიხედვით ცოდნის გაღრმავების ხელშეწყობის დამსახურებაა. სიმბოლურია ისიც, რომ პროექტების შესახებ ინფორმაციის მიღებაში ასევე უნივერსიტეტის საინფორმაციო პორტალები მეხმარება.

თუ ცოდნა უკვე გაიღმავე და ახალი შთაგონება გჭირდება, კიდევ უფრო ხშირად მოდი ილიაუნის ბიბლიოთეკაში, სადაც საკმაოდ მდიდარი რესურსები და კომფორტული გარემოა ყველა თქვენგანისათვის.

#WeAreIliauni #ISUCareers #ISUSuccessStories

 

 

Share Button

ელენე ჯოხაძე

ელენე ჯოხაძე, ილიას სახელმწიფო უნივერსიტეტის ბიზნესის სკოლის მაგისტრატურის სტუდენტი (ინგლისური სექტორი), ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

ელენე ერთი სემესტრი ალმა მატერ სტუდორიუმის უნივერსიტეტში (ბოლონია, იტალია) სწავლობდა ბიზნესის ადმინისტრირების ფაკულტეტის სამაგისტრო პროგრამაზე.

მსოფლიოში ერთ-ერთი უძველესი და სახელოვანი სასწავლებლის, ბოლონიის უნივერსიტეტის, ბიზნესის ადმინისტრირების პროგრამის მაგისტრანტი ვარ.

ბიზნესისადმი ჩემი მიდრეკილება ბავშვობაშივე აღმოვაჩინე. მეგობრების ჯგუფთან ერთად გასართობ ღონისძიებებს ვაწყობდი თანატოლებისთვის, რომლებსაც ვარწმუნებდი, რომ მათ მიერ სხვადასხვა აქტივობის დაგეგმვაში შეტანილი ფინანსური წვლილი, საბოლოოდ, ყველა ჩვენგანისთვის სასიკეთო აღმოჩნდებოდა. შედეგად ვიღებდით „ფინანსურ სარგებელს“, რომელიც მცირე, მაგრამ სასიამოვნო ჩანდა.

საბაკალავრო პერიოდში ჩემი აკადემიური და პროფესიული მისწრაფება ორიენტირებული იყო ბიზნესისა და ეკონომიკის სფეროებზე. აქტიურად ვესწრებოდი ლექციებს, დებატებს, ვიძენდი სამუშაო გამოცდილებას სხვადასხვა მიმართულებით, ვმონაწილეობდი კონკურსებში, იმისთვის რომ ჩემი ცოდნა და ინტერესი გაფართოებულიყო. მალევე მეგობრებთან ერთად შევქმენი სტარტაპი „ზილინა“, რომელიც სხვადასხვა ტიპის ღონისძიებების ორგანიზებას ემსახურება. ამავდროულად ჩავაბარე ილიაუნის ბიზნესის ადმინისტრირების (MBA) ინგლისურენოვან პროგრამაზე. ილიაუნიში სწავლისას ხშირად ვესწრებოდი Erasmus-ის მიერ ორგანიზებულ ტრენინგებს, როგორც საქართველოში, ასევე მის ფარგლებს გარეთ, ამიტომ მომინდა სწავლის საზღვარგარეთ გაგრძელება, ეს იქნებოდა საფუძვლიანი ინვესტიცია ჩემი განვითარებისთვის. გადავწყვიტე, გამომეყენებინა ის შესაძლებლობა, რაც ილიაუნისა და ერასმუსის დახმარებით მივიღე და ჩემი მიზნისთვის მიმეღწია.

ერასმუსის გაცვლითი პროგრამისთვის დათმობილი 6 თვე ჩემი ცხოვრების ერთ-ერთი უმნიშვნელოვანესი პერიოდია, სავსე სიახლეებითა და ცვლილებებით. იმ დროს ვახერხებდი უამრავი საქმის შეთავსებას და საკმაოდ წარმატებითაც გამომდიოდა. უცხოელ მეგობრებს ვაცნობდი საქართველოს კულტურას, ისტორიას, და როგორც თავად აღნიშნავდნენ, იმის მაგივრად, რომ მე მიმეღო კულტურული შოკი უცხო ქვეყანაში ცხოვრებისას, თავად რჩებოდნენ საქართველოთი გაოგნებულები.

ყველა სტუდენტს ვურჩევ, აუცილებლად სცადოს გაცვლით პროგრამაში მონაწილეობა და ის ენით გამოუთქმელი შთაბეჭდილება მიიღოს, რისი შესაძლებლობაც მე მომცა ერასმუსმა.

ბოლონიის უნივერსიტეტის MBA პროგრამა საკმაოდ განსხვავდება ქართული სამაგისტრო პროგრამებისგან. იქ შესწავლილი საგნები დამეხმარა, უფრო საფუძვლიანად აღმექვა ჩემი პროფესია. საშუალება მომეცა, გამეცნო არაერთი მოწინავე კომპანიის წარმომადგენელი, რომლებიც გვიზიარებდნენ საკუთარ გამოცდილებას, და გამომემუშავებინა ის უნარ-ჩვევები, რომლებიც თანამედროვე ბიზნესგარემოსთვის ასე უცილებელია. ეს გამოცდილება, ვფიქრობ,  უმნიშვნელოვანეს წვლილს შეიტანს ჩემი გრძელვადიანი მიზნების განხორციელებაში და სწავლის პერიოდში ჩამოყალიბებული ურთიერთობებიც არანაკლებ მნიშვნელოვანი იქნება ჩემს კარიერულ განვითარებაში, ახალი შესაძლებლობებისა და ინიციატივების აღმოჩენაში.

#WeAreIliauni #ErasmusPlusISU

Share Button

ვერიკო ცომაია

ილიას სახელმწიფო უნივერსიტეტის მეცნიერებათა და ხელოვნების ფაკულტეტის ბაკალავრიატის სოციოლოგიის მიმართულებისა და მაგისტრატურის საერთაშორისო ურთიერთობების მიმართულების კურსდამთავრებული ვერიკო ცომაია თავისი გამოცდილების შესახებ გვიყვება:

ილიას სახელმწიფო უნივერსიტეტი  სხვადასხვა სერვისებით (სტუდენტური კლუბები, გაცვლითი პროგრამები, კონფერენციები, დასაქმების ფორუმები) ცდილობს  მაქსიმალურად შეუქმნას სტუდენტს პირობები საკუთარი უნარების რეალიზებისთვის. ასევე,  სტუდენტს აძლევს საშუალებას თეორიულ ცოდნასთან ერთად მიიღოს პრაქტიკული გამოცდილება.

ვამაყობ იმით რომ ილიაუნის კურსდმთავრებული ვარ.  ვიყავი სტიპენდიანტი რაც კიდევ უფრო მიზრდიდა მოტივაციას რომ კარგად მესწავლა.

ვარ ,,ახალგაზრდა სოციოლოგთა გაერთიანების”  წევრი 2012 წლიდან. ვახორციელებთ პროექტებს როგორც უნივერსიტეტის შიგნით ასევე, მის გარეთ. უნივერსიტეტი აფინანსებდა ბევრ საინტერესო პროექტს. მომცა  შესაძლებლობა სტუდენტური კლუბის სხვა წევრებთან ერთად ჩამეტარებინა სტუდენტებისთვის ლექციები სოციოლოგიაზე.

გავიმარჯვე  სოციოლოგთა კლუბის ორგანიზებულ კონკურსში, რის შედეგადაც ვიყავი ახალგარზრდა მკვლევარი პროექტში: „ძალაუფლების დანაწილება და „კონტროლისა და ბალანსის” პრინციპები საქართველოში“.    კონკურსში სწორედ ჩვენი სტუდენტური კლუბის სახელით ვმონაწილეობდი. ეს იყო ჩემი პირველი ანაზღაურებადი სამუშაო.

კიდევ ერთი საინტერესო პროექტი რომელმაც დიდი გამოცდილება შემძინა იყო კონკურსი „კულტურათაშორისი ინტეგრაცია“.   აღნიშნული პროექტის ფარგლებში საშუალება მომეცა მონაწილეობა მიმეღო კვლევით პროექტში – „ქვემო ქართლსა და სამცხე-ჯავახეთში ახალგაზრდების ინტეგრაცია საგანმანათლებლო და კულტურული ინიციატივების გზით“.

ეთნიკური უმციერესობების ინტეგრაციის ხელშეწყობის მიზნით განვახორციელეთ პროექტი „შექმენი ტოლერანტული საზოგადოება“, რომელიც მოიცავდა საჯარო ლექციას, დისკუსიასა და ეთნიკურ უმცირესობებთან თემატურად დაკავშირებული ვორქშოფს. ეს არის არასრული ჩამონათვალი იმ პროექტებისა რომელიც დამეხმარა სტუდენტს თეორიულ ცოდნასთან ერთად მიმეღო პრაქტიკული გამოცდილება.

მაგისტრატურაზე  ჩაბარებისას არც კი მიფიქრია სხვა უნივერსიტეტში სწავლის გაგრძელებაზე.  დარწმუნებული ვიყავი რომ ახალ საფეხურზე კიდევ მეტ ცოდნას და გამოცდილებას მივიღებდი.

ვმუშაობ ეისითიში (ACT – ანალიზისა და კონსულტაციის ჯგუფი) , რომლის შესახებაც ინფორმაცია სწორედ დასაქმების ფორუმზე მივიღე. თავდაპირველად გავიარე სტაჟირება, შემდეგ დავიწყე მუშაობა როგორც პროექტულმა თანამშრომელმა, ამჟამად კი ვარ საველე სამუშაოების მენეჯერი.

სტუდენტებს ვურჩევ, რომ ბევრი იშრომონ საკუთარ თავზე, გამოიყენონ  უმარავი შესაძებლობა  რომელსაც ილიაუნი აძლევს სტუდენტებს, იყვნენ აქტიურები, მიზანდასახურლები, მიიღონ კარგი განათლება და აუცილებლად მიაღწევენ წარმატებას.

Share Button

მარიამ კვირტია

მარიამ კვირტია, ილიას სახელმწიფო უნივერსიტეტის მეცნიერებათა და ხელოვნების ფაკულტეტის მე-4 კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და საუნივერსიტეტო გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

მარიამი ორი სემესტრი იენის ფრიდრიხ შილერის უნივერსიტეტის (გერმანია) ფილოსოფიის  ფაკულტეტზე სწავლობდა.

ალბათ ამ ნაწერს ბევრი ადამიანი წაიკითხავს, რომელთაგან არაფრით განვსხვავდები. ბევრის მსგავსად სწავლის პარალელურად ვმუშაობდი, ამიტომ  სწავლას კარგად ვერ ვახერხებდი და არც მიფიქრია სტიპენდიის მოპოვებაზე ან გაცვლით პროგრამაში მონაწილეობაზე. მეგონა, რომ ამას ბევრად გამორჩეული და მოტივირებული ადამიანები აღწევდნენ. დრო გადიოდა, ისევ ვმუშაობდი და თან ვსწავლობდი, თუმცა მივხვდი, რომ ასე ცხოვრება არ მომწონდა. მინდოდა ჩემი მე, ჩემი გზა  მეპოვა და მას გავყოლოდი. ყველასგან მოულოდნელად სამსახური მივატოვე და მთლიანად სწავლაზე გადავერთე. მართალია, შემოსავალი შემიმცირდა, მაგრამ ვგრძნობდი, იმას ვაკეთებდი, რაც მხიბლავდა, ინტერესითა და სიხარულით ვსწავლობდი. შემთხვევით, საცდელად, შევიტანე განაცხადი გაცვლითი პროგრამის კონკურსზე.  სტიპენდია მოვიპოვე და გაცვლით პროგრამაშიც გავიმარჯვე. ამიტომ ვფიქრობ, ყველა ადამიანმა, პირველ რიგში,  საკუთარი თავი უნდა იპოვოს, ჰქონდეს რწმენა და წარმატება თავისთავად მოვა.

რაც შეეხება გერმანიას… ამ ქვეყანაზე ბევრი სტრეოტიპული წარმოდგენა გვაქვს, თუმცა რეალობა სხვანაირი აღმოჩნდა. ერთწლიანი ცხოვრების განმავლობაში დავინახე, როგორ უფრთხილდებიან თავიანთ ქალაქს, გარემოსა თუ სხვა ადამიანებს. ღიმილი და კეთილგანწყობა  აძლიერებს ქვეყანას, თანადგომისა და ერთიანობის განცდას ტოვებს. ის, რის შესახებაც შორიდან მსმენოდა,  თვალწინ გამიცოცხლდა. გავეცანი მათ კულტურას და ბევრი მეგობარი შევიძინე. ჩემი ფაკულტეტი ძალიან საინტერესო აღმოჩნდა, გვასწავლიდნენ კულტურათა შორის განსხვავებებსა თუ თანხვედრას, ასევე როგორ უნდა გვესწავლებინა ჯგუფისთვის, რომელიც  განსხვავებული კულტურის ადამიანებს უყრიდა თავს. დავინახე, როგორი განსხვავებულია ასეთი ადამიანების რეალობისა და სამყაროს აღქმა.

მარტო ცხოვრებამ, სხვადასხვა ქვეყნისა თუ მუზეუმის მონახულებამ, პიროვნულად  გამზარდა, ადამიანებთან ურთიერთობისა თუ დიდი პროფესიული გამოცდილება მივიღე, რაც მთავარია, მტკიცედ მჯერა, რომ ენთუზიაზმი და შრომა უპასუხოდ არასდროს რჩება. ახლა ისევ საქართველოში ვარ და მინდა, ცოდნა  ქვეყანას მოვახმარო. მინდა ჩემი ისტორია ბევრისთვის მოტივაცია იყოს, რომ საკუთარი თავის რწმენითა და მონდომებით მიზნის მიღწევა შესაძლებელია.

 

Share Button

ნინო დოლიძე

ილიას სახელმწიფო უნივერსიტეტის მეცნიერებათა და ხელოვნების ფაკულტეტის ქართული ფილოლოგიის მიმართულების სტუდენტი ნინო დოლიძე თავისი გამოცდილების შესახებ გვიყვება:

ილიას სახელმწიფო უნივერსიტეტი გამორჩეულად ზრუნავს სტუდენტების დასაქმებაზე. მათ  ილიაუნის შესაბამისი დეპარტამენტი აწვდის ინფორმაციას ვაკანსიებისა და სტაჟირებების შესახებ. ერთ დღესაც UNI-JOBS-ის მეილიდან მომივიდა ინფორმაცია, რომ ილიას სახელმწიფო უნივერსიტეტი  გვთავაზობდა სტაჟირებას, რომელში დარეგისტრირებაც მხოლოდ მე-4 კურსელებს შეეძლოთ. რეგისტრაცია ოქტომბრის დასასრულს იწყებოდა და რომ არა არგუსზე დადებული ინფორმაცია ვადის შესახებ, რეგისტრაციის გარეშე დავრჩებოდი.

დღეს ილიაუნის ბიბლიოთეკის მომსახურების განყოფილებაში ვმუშაობ. სტუდენტებთან ყოველდღიური ურთიერთობა ძალიან მსიამოვნებს, მომწონს გარემო და ადამიანები, რომლებთან ურთიერთობაც მიწევს. მაქსიმალურად ვცდილობ, სტუდენტებსა და აკადემიურ პერსონალს სასურველი ლიტერატურის მოძიებასა და შერჩევაში დავეხმარო. სამსახური მეც მეხმარება უფრო მეტი წიგნის გაცნობაში, აქ ვეცნობი საკმაოდ ძველ გამოცემებს, მაქვს ინფორმაცია უახლეს წიგნებზე. ეს ყველაფერი ძალიან მნიშვნელოვანია ჩემი პროფესიისთვის. სამსახურის დაწყებამდე ილიაუნის ბიბლიოთეკის აქტიური მკითხველი ვიყავი. აქ ძალიან კარგი გარემოა შექმნილი, რომ გაეცნო სასურველ ავტორებს, წიგნებს, ინფორმაციებს. ახლა ამ ბიბლიოთეკის ნაწილი მეც ვარ და ეს მახარებს.

ამ დრომდე ვერსად ვახერხებდი მუშაობას, რადგან სამუშაო და სასწავლო გრაფიკს ერთმანეთთან ვერ ვათავსებდი. თუმცა ადამიანის მიზნები და შესაძლებლობები ინდივიდუალურია და ბევრი რამ მაინც უნარ-ჩვევებზეა დამოკიდებული. მთავარია, გამოიყენო ყოველი შანსი, სტაჟირება (მე სამი თვე გავდიოდი სტაჟირებას). ჩემი გამოცდილებიდან გამომდინარე, დავრწმუნდი, რომ თუ გიყვარს საქმე, რასაც აკეთებ, თუ სიამოვნებას განიჭებს და მთელს ძალისხმევას დებ, აუცილებლად დაგიფასდება.

სტუდენტებს აქტიურობას ვურჩევ, რადგან ესეც ამაღლებს მოტივაციას, რომელიც უმთავრესი და  გადამწყვეტია ამა თუ იმ საქმის კეთებისას. თავდაჯერებულები უნდა იყვნენ და ყოველი დღე მოახმარონ საკუთარ განვითარებასა და ცოდნის მიღებას.

#WeAreIliauni #ISUCareers #ISUSuccessStories

Share Button

მარიამ ღამბაშიძე

მარიამ ღამბაშიძე, ილიას სახელმწიფო უნივერსიტეტის განათლების ადმინისტრირების მაგისტრი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

მარიამი ერთი სემესტრი ტურკუს უნივერსიტეტში (ფინეთი) – განათლების მეცნიერებების სამაგისტრო პროგრამის მიმართულებით სწავლობდა.

კომუნიკაბელური ვარ. ძალიან მიყვარს ადამიანების მოტივირება. ჩემი ფინური ცხოვრება შთაბეჭდილებების, ემოციებისა და ინფორმაციის ზღვა იყო. შემიყვარდა ფინური კულტურა, მათი ტრადიციები და ცხოვრების წესი. გავიცანი სხვადასხვა კულტურული გამოცდილების მქონე ადამიანები. მიხარია, რომ ჩემი ცხოვრება ამ მხრივ მრავალფეროვანი გახდა.

ყველაზე საინტერესო მაინც ფინური განათლების სისტემის გაცნობა აღმოჩნდა. ბევრი დადებითი მსმენოდა, თუმცა ნანახმა ყოველგვარ მოლოდინს გადააჭარბა. მომეცა ფინეთის სკოლებზე დაკვირვების საშუალება. ვესწრებოდი გაკვეთილებს,  ინტერვიუებს ვიღებდი სკოლის დირექტორების, პედაგოგებისა და მოსწავლეებისგან. მივხვდი, რომ ნდობა, თავისუფლება და თანასწორობა აქცევს ფინური განათლების სისტემას სამაგალითოდ.

#WeAreIliauni #ErasmusPlusISU

Share Button

ანა გელაშვილი

ილიას სახელმწიფო უნივერსიტეტის ბიზნესის სკოლის მენეჯმენტის მიმართულების მე-4 კურსის სტუდენტი ანა გელაშვილი თავისი გამოცდილების შესახებ გვიყვება:

ილიას სახელმწიფო უნივერსიტეტმა, გარდა თეორიული ცოდნისა, დიდი პრაქტიკული გამოცდილება მომცა. ჩემი საინტერესო სტუდენტობა, შეიძლება ითქვას, სამ ეტაპად იყოფა.

ყველაფერი დაიწყო FESC-მომავალ ეკონომისტთა სტუდენტურ კლუბში გაწევრიანებით, შემდეგ კი მისი ხელმძღვანელობით. კლუბი ჩემთვის მენეჯმენტის მიმართულებით პრაქტიკული გამოცდილების კარგი საშუალება გახდა.

შემდეგ პირველი სამსახური დავიწყე. უნივერსიტეტს ამაშიც დიდი წვლილი მიუძღოდა. იმ კომპანიის დირექტორი, რომელშიც ვმუშაობ, ჩვენთან კითხულობდა ლექციებს სოციალური-მედია მარკეტინგის თემაზე. საგანი კარგად ჩავაბარე და შემომთავაზა, მის კომპანიაში სოციალური მედიამენეჯერის ვაკანსიაზე გასაუბრება გამევლო. საცდელი დავალება კარგად დავძლიე და უკვე ერთ წელზე მეტია ვმუშაობ, როგორც სოციალური მედიამენეჯერი.
მესამე, ყველაზე საინტერესო, ეტაპი სტარტაპერობაა. ილიაუნი ამაშიც დამეხმარა. გავიარე Fablab Iliauni-ის 2d დიზაინის კურსი, სწავლისას დამებადა საფულის შექმნის იდეა. პირველი შეკერილი საფულე ისე მომეწონა, გადავწყვიტე სხვადასხვა დიზაინი მეცადა, საბოლოოდ კი ამან სერიოზული სახე მიიღო, დავიწყე ონლაინგაყიდვა და ჩამოყალიბდა ბრენდი Fully-ფული.

როგორც უკვე ვთქვი სოციალური მედიამენეჯერი ვარ. მუდმივად ვფიქრობ ახალ და კრეატიულ იდეებზე. გარდა ამისა, ვმუშაობ ერთმანეთისგან სრულიად განსხვავებულ გვერდებზე, რაც შემოქმედებითი პროცესია.
ამასთან თავს ბედნიერად ვგრძნობ სტრაპტერის ამპლუაში. მსიამოვნებს, რასაც ვაკეთებ და ძალიან მიხარია,როდესაც მომხმარებელი აღფრთოვანებული რჩება. პროცესი, რასაც ჩემს ბრენდთან ერთად გავდივარ, სირთულეებით არის სავსე, მაგრამ მოტივაციას წარმოუდგენელი წინააღმდეგობის გადალახვა შეუძლია.

სამსახური ჩემთან თავისით მოვიდა. ილიაუნიში კლუბის ხელმძღვანელობისას ძალიან მიყვარდა, რასაც ვაკეთებდი. თუმცა მუშაობას ვერ დავიწყებდი უნივერსიტეტში შეძენილი ცოდნისა და უნარების გარეშე. იმისთვის, რომ სასურველი სამსახური ვიპოვოთ, აუცილებელია, მოვინდომოთ, მაქსიმუმი გავაკეთოთ და დამსაქმებელს დავანახოთ, ეს საქმიანობა ჩვენთვის რაოდენ მნიშვნელოვანია და ჩვენს ძლიერ მხარეებს გავუსვათ ხაზი.

სტუდენტებს ვურჩევ, იყვნენ აქტიურები, როგორც ლექციებზე, ასევე საუნივერსიტეტო ცხოვრებაში. არასდროს ვიცით, სად და როდის გამოგვიჩნდება შესაძლებლობა, რომელიც ჩვენს ცხოვრებას შეცვლის. შეიძლება, ხშირად ჩვენს თავს ვერც ვხედავდეთ რომელიმე საქმეში, მაგრამ საკუთარი თავის გამოცდამ ბევრი დადებითი რამ მოგვიტანოს. უნდა გამოვიყენოთ ყველა შესაძლებლობა, რასაც უნივერსიტეტი გვაძლევს, განსაკუთრებით მაშინ, როდესაც არსებობს Fablab Iliauni-ის სივრცე და არაერთი პრაქტიკული კურსი, რომლებიც საკუთარი თავისა და იდეების აღმოჩენაში გვეხმარება.

#WeAreIliauni #ISUCareers #ISUSuccessStories

Share Button

თამარ ხუციშვილი

თამარ ხუციშვილი, ილიას სახელმწიფო უნივერსიტეტის ბიზნესის სკოლის (მენეჯმენტის მიმართულებით) მე-3 კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

თამარი ერთი სემესტრი ფრიდრიხ შილერის უნივერსიტეტში (იენა, გერმანია) სწავლობდა ეკონომიკის მიმართულებით.

გერმანულ სკოლაში ვსწავლობდი და ყველაზე მეტად გერმანიაში სწავლის გაგრძელება მინდოდა. ქალაქიც შერჩეული მქონდა, უნივერსიტეტიცა და ფაკულტეტიც. ჩემი მიზანი ბევრს არარეალურად ეჩვენებოდა, თუმცა მჯეროდა, რომ ყველაფერი ჩემს ძალისხმევაზე იყო დამოკიდებული. სკოლის დამამთავრებელი კლასი იმაზე ფიქრში გავატარე, რომელ უნივერსიტეტში ჩამებარებინა, გაცვლით პროგრამებში მონაწილეობის შესაძლებლობა რომ მქონოდა. ესეც იყო ილიაუნიში ჩაბარების ერთ-ერთი მიზეზი და მიხარია, რომ სწორი არჩევანი გავაკეთე. ბევრი არაფერი ვიცოდი უნივერსიტეტის შესახებ, მხოლოდ ერთი ფრაზა მიტრიალებდა თავში: „შენი საინტერესო ცხოვრება იწყება აქ“ და დღეს თამამად შემიძლია ვთქვა, რომ ჩემი საინტერესო ცხოვრება ნამდვილად ილიაუნიში დაიწყო.

პირველი შესაძლებლობისთანავე მივიღე მონაწილეობა Erasmus-ის გაცვლით პროგრამაში და დადებითი პასუხიც მივიღე. იენის ფრიდრიხ შილერის უნივერსიტეტში ეკონომიკის მიმართულებით ვსწავლობდი ერთი სემესტრი. სწავლა საკმაოდ რთული იყო, თუმცა ეს ჩემი ცხოვრების საუკეთესო ხანა იყო უამრავი სიახლით, თავგადასავლითა და საინტერესო მოგონებებით სავსე. ამ პერიოდმა გადამწყვეტი როლი ითამაშა ჩემს არა მხოლოდ კარიერულ, არამედ პიროვნულ განვითარებაში და ბევრი რამ სხვა თვალით დამანახა. გირჩევთ, არასოდეს შეგეპაროთ ეჭვი საკუთარ შესაძლებლობებში, რადგან ყველაფრის მიღწევა შესაძლებელია დიდი სურვილისა და შრომის შედეგად.

#WeAreIliauni #ErasmusPlusISU

 

Share Button

ანა მიქაუტაძე

ილიას სახელმწიფო უნივერსიტეტის მეცნიერებათა და ხელოვნების ფაკულტეტის საჯარო პოლიტიკის ადმინისტრირების მიმართულების კურსდამთავრებული ანა მიქაუტაძე თავისი გამოცდილების შესახებ გვიყვება:

ილიას სახელმწიფო უნივერსიტეტის პოლიტიკა, თავის სტუდენტებს დასაქმებაში დაეხმაროს, მისაბაძია ყველა უმაღლესი სასწავლო დაწესებულებისათვის. სამაგისტრო პროგრამაზე ჩაბარებისას ვერც კი წარმომედგინა, რომ ერთ დღეს ილიაუნის უზარმაზარი, მაგრამ შეკრული გუნდის წევრი გავხდებოდი და მეც შევიტანდი წვლილს მის საქმიანობაში. უნივერსიტეტში ჩაბარებიდან 3 თვეში ჩავერთე ილიაუნის აშშ-ის წიგნების თარგმნის პროექტში. ვაკანსიის შესახებ ინფორმაცია პედაგოგმა მოგვაწოდა იმ სტუდენტებს, რომლებმაც გასაუბრებაზე ინგლისური ენის საკმარისი კომპეტენცია გამოვავლინეთ. ამ პროექტის დასრულების შემდეგ საქმიანობა განვაგრძე ილიაუნის “USAID collaborative governance Program”-ის ფარგლებში რუსულენოვანი ასისტენტის პოზიციაზე. ამ ვაკანსიის შესახებაც საჯარო ადმინისტრირების სამაგისტრო პროგრამის სტუდენტებმა პროგრამის ხელმძღვანელისგან გავიგეთ. მისი დასრულების შემდეგ 5 თვის განმავლობაში ილიაუნის განვითარების სამსახურში სტაჟირებისას ვეცნობოდი დეპარტამენტის საქმიანობას, Erasmus+, რუსთაველისა და სხვა საგრანტო პროექტების წერისა და მართვის სპეციფიკას. შემდეგ ვიმუშავე მეცნიერებათა და ხელოვნების ფაკულტეტთან არსებულ საჯარო პოლიტიკის კვლევისა და ტრენინგების ცენტრში პროექტის ასისტენტად, ასევე განვაგრძობდი აშშ-ის წიგნის თარგმნის პროგრამის ფარგლებში პოლიტიკის მეცნიერების მიმართულებით ლიტერატურის თარგმნას. შემდეგ კვლავ განვითარების სამსახურში დავბრუნდი მოწვეულ სპეციალისტად, მერე მუშაობა განვაგრძე მეცნიერებათა და ხელოვნების ფაკულტეტის დეკანის თანაშემწის პოზიციაზე.

სტუდენტების, აკადემიური და ადმინისტრაციული პერსონალის დახმარება, ეფექტური კომუნიკაცია უნივერსიტეტის შიდა სტრუქტურულ ერთეულებთან, სხვადასხვა ხასიათის კორესპონდენციების მომზადება, სწავლის პროცესში წარმოქმნილ პრობლემებზე რეაგირება, ფაკულტეტის მოდერნიზაციის საქმეში წვლილის შეტანა საკმაოდ საინტერესო პროცესია, რადგან ახალ-ახალ გამოწვევებს ვაწყდები, რომელთა დაძლევაც, თავის მხრივ, პროცესების ოპტიმიზაციებისა და ეფექტიანი მართვისაკენ გადადგმული ნაბიჯია. ეს ყოველივე ჩემს სამუშაოს ძალიან მრავალფეროვანს და საინტერესოს ხდის.

საქართველოში სამსახურის დაწყება ნამდვილად რთულია, რადგან შრომის ბაზარზე პერსონალზე მოთხოვნა გაცილებით ნაკლებია, ვიდრე მიწოდება. ეს განსაკუთრებით ეხება სოციალური და პოლიტიკური მეცნიერებების პროგრამების კურსდამთავრებულებს. მაღალი კონკურენციის პირობებში რთულია, საკუთარი თავი დამსაქმებელს ისე დაანახო, რომ 10, 100 ან თუნდაც 1000 კანდიდატიდან სწორედ შენზე შეაჩეროს არჩევანი. მთავარი უნარი, რაც სასურველი სამსახურის მოძიებისთვისაა საჭირო, არის შეუპოვრობა, ახალი ცოდნის დაუფლებისკენ სწრაფვა, საკუთარ ძალებში დარწმუნება, გარემოსთან ადაპტაციისა და ეფექტური კომუნიკაციის უნარები, უცხო ენების ცოდნა და ა.შ. ეს თვისებები შედარებით ამარტივებს სამუშაოს ძიების პროცესს.

სტუდენტებს ვურჩევ, რაც შეიძლება მეტი დრო დაუთმონ სწავლას, განსაკუთრებით საბაკალავრო საფეხურზე თეორიული სწავლის კომპონენტს. შესაძლოა, ერთი შეხედვით მოგეჩვენოთ, რომ ის, რასაც დღეს სწავლობთ, მხოლოდ თეორიაა, რასაც მომავალში დასაქმების თვალსაზრისით ვერ გამოიყენებთ, მაგრამ, დამერწმუნეთ, ასე არ არის. მნიშვნელოვანია, პრიორიტეტების სწორად განსაზღვრა – როდესაც სწავლასა და მუშაობას შორის გიწევთ არჩევანის გაკეთება, უმჯობესია დრო და ენერგია სწავლისაკენ მიმართოთ. ასევე კარგია, თუ მუდმივად ცდილობთ ცოდნის განახლებას, მუდმივად ეცნობით დარგის სიახლეებს. ეს თვისებაც კარგად წარმოგაჩენთ დამსაქმებლის თვალში.

#WeAreIliauni #ISUCareers #ISUSuccessStories

Share Button