ნათია ჩუბინიძე

ნათია ჩუბინიძე, ილიას სახელმწიფო უნივერსიტეტის მეცნიერებათა და ხელოვნების ფაკულტეტის ფსიქოლოგიის მიმართულების მე-4 კურსის სტუდენტი და ბურგერლანდის (ავსტრია) გამოყენებითი მეცნიერებების უნივერსიტეტის (https://www.fh-burgenland.at/en/) სოციოლოგიის ფაკულტეტის გაცვლითი პროგრამის მონაწილე.

„ჩემთვის ეს იყო მრავალმხრივი გამოცდილება და დაუვიწყარი თავგადასავალი, რომლის ფარგლებშიც მომეცა ძალიან დიდი შესაძლებლობა როგორც სწავლის, ისე პიროვნული განვითარებისათვის. გავეცანი სწავლის განსხვავებულ სისტემას, შევიძინე მეგობრები სხვადასხვა ქვეყნიდან, ვეზიარე მათ კულტურასა და ტრადიციებს, გავხდი მეტად დამოუკიდებელი პიროვნება. ჩემთვის მოცემული პერიოდი დიდი სიახლეებითა და დადებითი ემოციებით იყო დატვირთული.

აქედან გამომდინარე, ვთვლი, რომ Erasmus + ეს არის შესაძლებლობა მრავალმხრივი გამოცდილების მიღებისა, რომელიც ყველა სტუდენტმა უნდა გამოსცადოს“.

 

Share Button

ნინო ბატიაშვილი

ნინო ბატიაშვილი – ილიას სახელმწიფო უნივერსიტეტის ბიზნესის, ტექნოლოგიისა და განათლების ფაკულტეტის განათლების ადმინისტრირების მაგისტრატურის სტუდენტი და კლაგენფურტის (ავსტრია) Alpen Adria Universität Klagenfurt (https://www.aau.at/en/) ფაკულტეტის – Schulpädagogik-ის (სასკოლო პედაგოგიკა) პროგრამის მონაწილე

„2019 წელს მოვიპოვე ერაზმუს+ სტიპენდია და მომეცა არაჩვეულებრივი შანსი, ერთი სემესტრი მესწავლა ავსტრიის ერთ-ერთ საუკეთესო უნივერსიტეტში – Alpen Adria Universität-ში.ეს ჩემი პირველი გაცვლითი სემესტრი არ ყოფილა, თუმცა, ძალიან ნაყოფიერი აღმოჩნდა ჩემთვის. მართალია, ბოლონიის პროცესში გაწევრიანების შემდეგ საბედნიეროდ ქართველ სტუდენტებს  საზღვარგარეთ სწავლა ბევრად იოლად შეუძლიათ, მაგრამ ამ სემესტრში გამოვცადე, რომ ეს პროცესი კიდევ უფრო დაიხვეწა და გამარტივდა. ავსტრიაში დამხვდნენ საქმის ნამდვილი პროფესიონალები, ძალიან სასიამოვნო ადამიანები და ყველანაირად დამეხმარნენ.; უნივერსიტეტმა შემომთავაზა განსხვავებული, საინტერესო საგნების ფართო არჩევანი და არაჩვეულებრივი ლექტორები; სალექციო პროცესი ძალიან დინამიკური, სტუდენტებზე ორიენტირებული და თანამედროვე გამოწვევებს მორგებულია. ყველა ლექტორი ცდილობს, უახლესი მასალა და ქეისები მიაწოდოს სტუდენტებს, ლექციები ძალიან ინტერაქციული, ცოცხალი და საინტერესოა. ამ სემესტრში ბევრი ვიმუშავე საკუთარ თავზე, გავეცანი მრავალ საინტერესო მკვლევარს, უფრო დავხვეწე გერმანული და ინგლისური ენები და კიდევ უფრო კარგად დავინახე ჩემი  გეგმები და პერსპექტივები.

ერაზმუსი, როგორც პროფესიული, ისე პიროვნული ზრდის ბრწყინვალე შანსია ყველა სტუდენტისთვის, ცოდნასთან ერთად კი მთელი მსოფლიოდან ჩამოსული მეგობრების შეძენაა შესაძლებელი, ამიტომ, ვფიქრობ, საზღვარგარეთ, თუნდაც მცირე ხნით სასწავლებლად წასვლა საუკეთესო საჩუქარია, რომელიც შეგვიძლია ჩვენს თავს გავუკეთოთ.

Share Button

მარიამ ლეჟავა

მარიამ ლეჟავა –  ილიას სახელმწიფო უნივერსიტეტის ბიზნესის, ტექნილოგიისა და განათლების ფაკულტეტის საზოგადოებრივი ურთიერთობების მაგისტრატურის სტუდენტი და ბერლინის (გერმანია) ჰუმბოლტის უნივერსიტეტის (www.hu-berlin.de) English and American Studies-ს გაცვლითი პროგრამის მონაწილე

„ილიაუნის საზოგადოებრივი ურთიერთობების სამაგისტრო პროგრამაზე ჩაბარება ალბათ საუკეთესო გადაწყვეტილებაა, რაც კი ოდესმე მიმიღია. გარდა საქართველოში მიღებული ხარისხიანი განათლებისა, უნივერსიტეტმა შესაძლებლობა მომცა, გავმხდარიყავი ერაზმუსის სტიპენდიატი და ერთი სემესტრი ყველასათვის საოცნებო ქვეყანასა და უნივერსიტეტში მესწავლა.

ჩემთვის უდიდესი გამოცდილება იყო ვყოფილიყავი სტუდენტი უნივერსიტეტისა, სადაც აინშტაინი, ჰეგელი, შოპენჰაუერი, ძმები გრიმები თუ სხვა გენიოსები სწავლობდნენ და ასწავლიდნენ. გამოვარჩევდი უნივერსიტეტის სწავლის განსაკუთრებულ მეთოდებსა და მრავალფეროვან გარემოს. ჰუმბოლტის ყველა ლექცია თუ სემინარი კრიტიკულ აზროვნებასა და მსჯელობის უნარების განვითარებისკენ იყო მიმართული და მიმაჩნია, რომ ამ უნარ-ჩვევებზე მეტი აქცენტირება ქართული განათლების სისტემისთვისაც აუცილებელი პრიორიტეტი უნდა გახდეს.

გამოცდილებასთან ერთად ვგრძნობდი პასუხისმგებლობასაც, რადგან,როდესაც საერთაშორისო სტუდენტების გარემოცვაში იმყოფები, ცალკეული ადამიანიც კი მათთვის მთლიანი ქვეყნის სახეს წარმოადგენს.

გერმანიაში ცხოვრებით მეტად გავიაზრე საქართველოსა და კონკრეტულად თბილისის პრობლემები თუ გამოწვევები, თუმცა ასევე უფრო დავაფასე ჩვენი ქვეყანა, რადგან, როდესაც დაბადებიდან ერთ ქვეყანაში ცხოვრობ, შენთვის მისი უნიკალურობა ხშირად შეუმჩნეველი მოცემულობა ხდება. თითქმის ყველამ იცოდა ჩვენი ენის, კერძების, ბუნებისა და დამწერლობის შესახებ. ჩემმა ბრიტანელმა ლექტორმა ქართული ანბანის  სწავლებაც კი მთხოვა. ვფიქრობ, ევროპაში საქართველოს ასეთი კუთხით წარმოჩენასა და პოპულარიზაციაზე ფრანკფურტის წიგნის ბაზრობამაც უდიდესი გავლენა მოახდინა.

გავიცანი უამრავი საინტერესო ადამიანი და შევიძინე ახლო მეგობრები, რომლებიც უკვე გეგმავენ საქართველოში ჩამოსვლას. ბერლინში ცხოვრების თითოეული დღე კი ჩემთვის საუკეთესო თავგადასავლებსა და მოგონებებთან ასოცირდება“.

 

Share Button

თათია მარაული

თათია მარაული – ილიას სახელმწიფო უნივერსიტეტის მეცნიერებათა და ხელოვნების ფაკულტეტის პოლიტიკის მეცნიერების სოციოლოგიის პროგრამის მეოთხე კურსის სტუდენტი, ილიაუნის Erasmus+ ის გაცვლითი პროგრამების სტიპენდიატი და კოპენჰაგენის საუნივერსიტეტო კოლეჯ UCC-ის (დანია) სოციოლოგიის გაცვლითი პროგრამის მონაწილე

მეოთხე კურსის პირველ სემესტრში გაცვლითი პროგრამით კოპენჰაგენში, დანიაში, ვიყავი წასული. ილიას სახელმწიფო უნივერსიტეტში სოციოლოგიას ვსწავლობ, თუმცა დანიაში თავისუფალი კრედიტები გამოვიყენე და  3 საგანი გავიარე მასწავლებლის პროფესიის პროგრამიდან, რაც საკმაოდ საინტერესო იყო.

დანიაში გატარებული 5 თვე  დაუვიწყარი იყო ემოციებით, სირთულეებით, გამოცდილებით, ადამიანებით, მრავალფეროვნებითა და სიახლეებით.

ძალიან მნიშვნელოვანია, რომ ადამიანმა შეძლოს  თვითგანვითარება, ეს პროგრამა კი ამაში დამეხმარა. მომცა შესაძლებლობა საზღვარგარეთ სწავლისა, დამოუკიდებლობისა, სტუდენტურ სამსახურში მუშაობის და ასევე სხვადასხვა ქვეყანაში მოგზაურობისა. 5 თვე ვიყავი  სრულიად სხვა სამყაროში, სადაც მხოლოდ ჩემი თავის იმედი მქონდა. ამის შემდეგ კი სიამაყე ვიგრძენი, რადგან დამოუკიდევლად ბევრი რამის გაკეთება შევძელი.

დანიაში სწავლა სრულდებოდა დეკემბერში, საშობაოდ. უნივერსიტეტში გაიმართა საშობაო კონცერტი, რომელშიც  ჩემს დანიელ და სხვა უცხოელ  სტუდენტებთან ერთად ვმონაწილეობდი -ლამაზად მორთულ სცენაზე ყველანი ერთად ვმღეროდით დანიურ სიმღერას (რომლის ტექსტიც ნახევარზე მეტს არ გვესმოდა). არ დამავიწყდება ის სიმშვიდის განცდა. მეამაყებოდა, რომ ყველაფრის გადალახვა შევძელი, სწავლაც წარმატებით დავამთავრე, გავიცანი ბევრი საინტერესო ადამიანი, თან თითქოს იქაურობის ნაწილი ვიყავი.

ეს  შესაძლებლობა  ყველამ აუცილებლად უნდა გამოიყენოს და არ შეუშინდეს გამოწვევებს.

Share Button

სოსო კურატიშვილი

სოსო კურატიშვილი – ილიას სახელმწიფო უნივერსიტეტის მეცნიერებათა და ხელოვნების ფაკულტეტის პოლიტიკის მეცნიერების პროგრამის მესამე კურსის სტუდენტი და უფსალის (შვედეთი) უნივერსიტეტის https://www.uu.se/en Department of Government-ის გაცვლითი პროგრამის მონაწილე.

შვედეთში ჩასვლისთანავე სრულიად ახალი სამყარო აღმოვაჩინე, ჩვენი სოციუმისგან ძირეულად განსხვავებული. ამ ქვეყნის ფუნდამენტი თანასწორობაა და ყველა და ყველაფერი სწორედ ამ კონცეპტზეა დაშენებული. ამიტომ  აბსოლუტურად ყველა ცდილობს დაგეხმაროს, დაგიმეგობრდეს და საუკეთესო გამოცდილება დაგიტოვოს.

ყველაზე დიდი შთაბეჭდილება სწავლის იქაურმა სტანდარტმა მოახდინა. ლექტორები ცდილობენ, თავი მათთან თანაბარი სტატუსის მქონედ გაგრძნობინონ. საკმაოდ დიდი დრო ეთმობა დამოუკიდებელ კვლევებს, რომლებიც  სტუდენტებს საშუალებას აძლევს სხვადასხვა საკითხზე დასკვნები თავად გააკეთონ. ეს ყოველივე  საკმაოდ დიდ მოტივაციას ქმნის, რომ მოინდომო და მეტი ისწავლო. აღსანიშნავია,რომ ყველა საგანი ერთდროულად არ ისწავლება. თითოეული მხოლოდ 4-5 კვირას გრძელდება. ვფიქრობ, ეს პრაქტიკა ძალიან საყურადღებოა, კომფორტია, რადგან დროის ერთ მონაკვეთში მხოლოდ ერთ საგანზე ხარ მობილიზებული  და მხოლოდ მისი ჩაბარების შემდეგ იწყებ ახალს.

ჩემთვის ყველაზე საინტერესო საგანი, რომელიც რაც უფსალის უნივერსიტეტში გავიარე, შვედეთის პოლიტიკა იყო. ამკურსმა არა მარტო ქვეყნის საინტერესო ისტორიულ-პოლიტიკური განვითარება გამაცნო, არამედ დამანახა შვედეთის როლი გლობალურ პოლიტიკაში და უკეთ წარმოაჩინა მისთვის დამახასიათებელი სხვადასხვა სოციალურ-კულტურული ასპექტი.

შვედეთში, უფსალის უნივერსიტეტში, გატარებულმა დრომ ჩემზე საკმაოდ დიდი გავლენა მოახდინა და დარწმუნებით შემიძლია ვთქვა, რომ უკეთესობისაკენ შემცვალა, როგორც პროფესიულად, ასევე პიროვნულადაც.

და ბოლოს: ყველას, ვინც ერასმუს+ პროგრამაში ჩართვას აპირებს, ვურჩევ, არაფერზე ინერვიულოს, რადგან იქ მიღებულ გამოცდილებასა და შთაბეჭდილებებს ნამდვილად შეუძლია სხვა ყველაფერი  გადაწონოს.

Share Button

ნინო ჩანადირი

ნინო ჩანადირი, ილიას სახელმწიფო უნივერსიტეტის მეცნიერებათა და ხელოვნების ფაკულტეტის პოლიტიკის მეცნიერების მიმართულების მაგისტრანტი, ილიაუნის Erasmus+ ის გაცვლითი პროგრამების სტიპენდიატი და უფსალის (შვედეთი) უნივერსიტეტის მშვიდობისა და კონფლიქტების მიმართულების გაცვლითი პროგრამის მონაწილე.

„უფსალის უნივერსიტეტში სწავლასა და შვედეთში ცხოვრებაზე დიდხანს ვიცნებობდი და ეს  რეალობად იქცა. როდესაც ერაზმუსის გაცვლითი პროგრამისთვის აპლიკაციას ვავსებდი, უფსალის უნივერსიტეტი ჩემი ერთადერთი არჩევანი იყო, რადგან დანამდვილებით ვიცოდი, რომ ამ უნივერსიტეტს შეეძლო შემოეთავაზებინა სწავლების უმაღლესი ხარისხი და დიდი გამოცდილება, რომელიც საქართველოში დაბრუნებულს აუცილებლად გამომადგებოდა. არც შევმცდარვარ. გაცვლითი პროგრამის პერიოდში ბევრი ახალი რამ ვისწავლე. თუმცა ყველაზე მნიშვნელოვანი ის არის, რომ ერაზმუსი გთავაზობს არა მხოლოდ  ცოდნის შეძენას, არამედ გამოცდილებას, რომელიც დაკავშირებულია მულტიკულტურულ გარემოში ცხოვრებასთან, მოგზაურობასთან, უამრავ სიახლესთან. გაცვლითმა პროგრამამ საშუალება მომცა, გამეცნო საინტერესო ადამიანები და მათ გვერდით საკუთარი თავი უკეთ აღმომეჩინა.

რაც შეეხება შვედეთს… საოცარი ქვეყანაა, ფერადი და ბედნიერებით სავსე. ვთვლი, რომ შვედეთში ცხოვრების პერიოდი ერთ-ერთი საუკეთესო იყო ჩემს ცხოვრებაში. საშუალება მომეცა მომენახულებინა ისეთი ადგილები, რომლებიც ჩემს „To Visit” სიაში წამყვან პოზიციებს იკავებდნენ. შვედები საოცრად თბილი და თავაზიანი ხალხია, რომლებიც დახმარებისათვის ყოველთვის მზად არიან. მათ საკმაოდ ძველი და ძალიან საინტერესო კულტურა აქვთ. და რაც ყველაზე მნიშვნელოვანია, მათ გვერდით ცხოვრების დროს შეუძლებელია ვერ შენიშნო წესრიგისა და კანონმორჩილების განცდა, რაც მოქალაქეების შეგნებაში უკვე ღრმადაა ფესვგადგმული.  სწორედ ეს ქმნის იმ უსაფრთხო, სუფთა და მოწესრიგებულ გარემოს, რომელშიც ისინი ცხოვრობენ.

მიღებულმა გამოცდილებამ მაჩვენა, რომ თუ მოინდომებ და მიზანმიმართული იქნები,, რეალობად შეიძლება იქცეს ის, რაც მანამდე რთულად წარმოსადგენი გეჩვენებოდა. ერაზმუსი სტუდენტებს აძლევს შანსს, რომელიც აუცილებლად უნდა გამოიყენონ, რათა უკეთ გაიცნონ ევროპა, გაიზარდონ პიროვნულად, მიიღონ ცოდნა და ქვეყანაში დაბრუნებულებმა სათანადოდ გამოიყენონ“.

Share Button

Entrepreneurship World Cup

Entrepreneurship World Cup საერთაშორისო სტარტაპკონკურსია, რომელშიც 100 ქვეყნის 60 000-ზე მეტი ანტრეპრენერი მონაწილეობს.

კონკურსი ხორციელდება Global Entrepreneurship Network (GEN)-ის Misk Global Forum (MGF)-თან თანამშრომლობით. საქართველოში პროექტის პარტნიორია GEN Georgia.

კონკურსში მონაწილეობდნენ ადრეულ ეტაპზე მყოფი ანტრეპრენერები, EWC Georgia 2019 წლის გამარჯვებული კი გახდა პროექტი Automechanic, რომელიც წარმოადგინა ილიას სახელმწიფო უნივერსიტეტის ანტრეპრენერების ჯგუფმა თამარ მახარიაშვილის, ქეთი ბერუაშვილისა და ანდრია თურვანდიშვილის შემადგენლობით.

პროექტი მიზნად ისახავს ავტომექანიკოსების მონაცემთა ბაზის შექმნას და  ავტომანქანის მფლობელებისთვის მათთან წვდომის გამარტივებას.პროექტის გამარჯვებული გუნდი მონაწილეობას მიიღებს ორთვიან გლობალურ ვირტუალურ სააქსელერაციო პროგრამაში და წვდომას

  • სტარტაპსაგანმანათლებლო რესურსებთან
  • უცხოელ მენტორებთან
  • ვირტუალურ ტრენინგკურსთან

გამარჯვებულებს შესაძლებლობა ექნებათ, მიიღონ 500 000$-ის ღირებულების სერვისები ისეთი კომპანიებისგან, როგორებიცაა: Oracle, Google Cloud, Shopify, Slack და Stripe და ჩაერთვებიან კონკურსის გლობალურ ფინალში, რომელიც ნოემბერში საუდის არაბეთში გაიმართება.

Share Button

თამარ ნიჟარაძე

#WeAreIliauni #ErasmusPlusISU

თამარ ნიჟარაძე, ილიას სახელმწიფო უნივერსიტეტის ბიზნესის სკოლის (საბანკო და საფინანსო საქმე), მე-4 კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

თამარი ერთი სემესტრი ტუშას უნივერსიტეტში (იტალია) –  ბიზნესის ადმინისტრირების საბაკალავრო პროგრამაზე სწავლობდა.

ლემშვენიერას საჯარო სკოლა ოქროს მედლით დავამთავრე და ილიაუნის ბიზნესის სკოლაში სრული სახელმწიფო გრანტით ჩავირიცხე. 4-ჯერ მივიღე პრეზიდენტის სტიპენდია. გავხდი ერასმუსის სტიპენდიატიც.

ამ პერიოდს ნამდვილად შემიძლია საოცარი თავგადასავლების 6 თვე ვუწოდო. სიამაყით მახსენდება, როდესაც მომეცა შესაძლებლობა, ტუშას უნივერსიტეტის მიერ მოწვეული ქართველი ლექტორების ლექციებსაც დავსწრებოდი.

საერთაშორისო გაცვლით პროგრამაში მონაწილეობა ძალიან დამეხმარა, როგორც აკადემიურ, ასევე პიროვნულ განვითარებაში. დავიწყე იტალიური ენის შესწავლა. გავეცანი ადგილობრივ აკადემიურ პერსონალს, საუნივერსიტეტო გარემოსა და სწავლების ხარისხს. ვიმოგზაურე რამდენიმე ქვეყანაში. შევხვდი არაერთ საინტერესო ადამიანს. გამიჩნდა საკუთარი ბიზნესსაქმიანობის დაწყების სურვილი.

ამ პერიოდმა მეტად დამოუკიდებელი გამხადა. ცხადად დამანახა, რომ შრომითა და მონდომებით ნებისმიერი ბარიერის გადალახვაა შესაძლებელი.

Share Button

მიხეილ ფაღავა

#WeAreIliauni #ErasmusPlusISU

მიხეილ ფაღავა, ილიას სახელმწიფო უნივერსიტეტის MBA-ის სამაგისტრო პროგრამის მენეჯმენტის მიმართულების პირველი კურსის სტუდენტი, ილიაუნის Erasmus + ის გაცვლითი პროგრამების სტიპენდიატი და გაცვლითი პროგრამის მონაწილე, თავისი გამოცდილებისა და შთაბეჭდილებების შესახებ.

მიხეილი ერთი სემესტრი ბურგენლანდის გამოყენებითი მეცნიერების უნივერსიტეტში (ავსტრია)  სწავლობდა საერთაშორისო ბიზნესურთიერთობების მიმართულებით. შემდეგ სემესტრში, ასევე ილიაუნის გაცვლითი პროგრამის ფარგლებში, ის საფრანგეთში, პარიზის ვალ-დე-მარნის უნივერსიტეტში გაემგზავრება.

ავსტრიიდან დაბრუნების შემდეგ სწავლა ილიას სახელმწიფო უნივერსიტეტის ინგლისურენოვან სამაგისტრო პროგრამაზე განვაგრძე, ამჟამად კი ვმუშაობ „ბრიტანულ-ქართულ კორპორაციაში“ საერთაშორისო შესყიდვების მენეჯერად. ბავშობიდანვე მოგზაურობისადმი სიყვარულმა, უცხოეთში სწავლის სურვილმა და მონდომებამ საშუალება მომცა, Erasmus + ის პროგრამით მესარგებლა ავსტრიაში, რამაც მნიშვნელოვანი ზეგავლენა მოახდინა ჩემს განვითარებასა და სამომავლო გეგმებზე.

რთულია, გადმოსცე უცხოეთში სწავლისა და ცხოვრების ემოციები და შთაბეჭდილებები: თავგადასავლები, ახალი ქვეყნები და მეგობრები, განსხვავებულ კულტურასთან ზიარება, სწავლების სისტემა, მოკლედ, ყველაფერი უცხო და საინტერესო. ახალ მეგობრებთან დღემდე მაქვს ურთიერთობა, რამდენიმე საქართველოშიც კი ჩამოვიდა, რათა უკეთესად გაეცნო ჩვენი ქვეყანა. დაუსრულებლად შეიძლება ისაუბრო იმ შთაბეჭდილებებზე, რაც გაცვლით პროგრამას ახლავს თან და, რა თქმა უნდა, გამონაკლისი არც ჩემს შემთხვევაშია, სწორედ ამიტომ ყველას ვურჩევ, საკუთარ თავზე გამოსცადონ ეს ყოველივე.

ყველაზე მეტად მაინც სწავლების განსაკუთრებულ სისტემას გამოვარჩევდი, რომელიც მთლიანად სტუდენტზე იყო ორიენტირებული, როგორც თეორიული, ასევე პრაქტიკული თვალსაზრისით. ლექტორები ცდილობდნენ, მიღებული თეორიული ცოდნა ადგილობრივ საწარმოებსა და ოფისებში გამოგვეყენებინა, რაც კიდევ უფრო ნაყოფიერს ხდიდა სწავლების პროცესს.

Share Button

გოგა საათაშვილი

ილიას სახელმწიფო უნივერსიტეტის ბიზნესის სკოლის მენეჯმენტის მიმართულების მე-4 კურსის სტუდენტი და ილიაუნის სამრეწველო ინოვაციების ლაბორატორიის ტექნიკური მენეჯერი გოგა საათაშვილი თავისი გამოცდილების შესახებ გვიყვება:

ფაბლაბ ილიაუნის სტაჟირების პროგრამის გავლის შემდეგ დამაინტერესა ლაბორატორიაში მუშაობამ, ამ დროს ილიაუნის ელფოსტითაც მივიღე ინფორმაცია ვაკანსიის შესახებ. ლაბორატორიაში მუშაობა შემეცნებითი პროცესია და პირველი დღიდანვე მქონდა რაღაც ახლის სწავლის, განვითარების შესაძლებლობა.

სასურველი საქმის პოვნა, სამსახურის დაწყება იოლი არ არის. სპეციფიკური უნარები უნდა გამოიმუშაო შენთვის საინტერესო სფეროში მუშაობისთვის, თუნდაც ანაზღაურების გარეშე იშრომო და გამოცდილება დააგროვო, რომ იპოვო საყვარელი საქმე.

ორი მიმართულებით ვმუშაობ – ინოვაციებიური იდეებისა ავტორებსა და ბიზნესის დაწყების მსურველებს ვეხმარები იდეის ხორცშესხმასა და პროდუქციის შექმნაში, რაც ყოველდღიურად ახალ გამოცდილებას მძენს, ასევე ვატარებ ტრენინგებს 2D გრაფიკულ დიზაინსა და ბიზნესის დასაწყებად საჭირო სტრატეგიასა და მოქმედებებზე.

სტუდენტებს ვურჩევ, არ ელოდონ სასწაულს, რომელიც მათ ვაკანსიებსა და სამსახურს შესთავაზებს. ყოველი ახალი დღე ახალი შესაძლებლობაა იმისთვის,რომ მიუახლოვდეთ საოცნებო სამსახურს ან შექმნათ საკუთარი ბიზნესი.

Share Button