მარიამ ხომერიკი

ილიაუნის ბიზნესის სკოლის მაგისტრანტი ბიზნესის ადმინისტრირების მიმართულებით

ამჟამად, Erasmus+ გაცვლითი პროგრამის ფარგლებში, სწავლობს ვარშავის (პოლონეთი) ეკონომიკურ სკოლაში.

🔶 ვკითხულობ სამეცნიერო ფანტასტიკას.

🔴 ​​ვუსმენ სხვადასხვა ჟანრის მუსიკას განწყობის შესაბამისად: პოსტროკს, მელოდიურ ელექტრონულ მუსიკას, ჰიპ-ჰოპს, თრეფს.

◾ვფიქრობ განვითარებაზე.

🔺მიყვარს თავგადასავლები.

⚪ მსურს შევქმნა საკუთარი სტარტაპი, რომელიც ხელს შეუწყობს სოციალური პრობლემების გადაჭრას.

◾თანატოლებს ვურჩევდი, არასოდეს თქვან უარი გამოწვევებზე და არ დაკარგონ ბრძოლის უნარი; გარდა პროგრამით გათვალისწინებული საკითხებისა, იკითხონ ბევრი და ისწავლონ ცოდნის და არა ქულების მისაღებად.

🔸დაბრუნების შემდეგ სწავლას გავაგრძელებ ილიაუნიში და პრაქტიკაში გამოვიყენებ მიღებულ ცოდნას.

🔴ილიაუნი არის უნივერსიტეტი, სადაც ჩაბარების ბევრ მიზეზს დავასახელებდი, თუმცა, მთავარი მაინც არის ის, რომ ილიაუნიმ მომცა შესაძლებლობა, მიმეღწია დიდი ხნის მიზნისთვის და მესწავლა საზღვარგარეთ. Erasmus + გაცვლითი პროგრამის შესახებ სწორედ ილიაუნის ვებგვერდიდან შევიტყვე.

🔷ჩემი პროფესია შესაძლებლობას მაძლევს გავერკვიო იმ ძირითად პროცესებსა და ტენდენციებში რაც ახასიათებს თანამედროვე ბიზნესგარემოს. ბიზნესის ადმინისტრირების, კერძოდ – მენეჯმენტის შესწავლა მაძლევს სტიმულს, ვიყო წარმატებული ამ სფეროში და ხელი შევუწყო მცირე ბიზნესის განვითარებას, რაც, თავის მხრივ, ხელს უწყობს ქვეყნის განვითარებას.

ლაშა სუხიშვილი

ილიას სახელმწიფო უნივერსიტეტის დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრი​ს გეოგრაფიის დეპარტამენტის უფროსი​; ​პასკალის პრემიის ლაურეატი 2015 და 2016 წლებში

🔶 ვკითხულობ წიგნებს, რომლებიც მიდევს თაროზე, მაგრამ ახლა რომ გადავხედე, საერთო ჯგუფში ვერ გავაერთიანე; ვკითხულობ, ასევე, პროფესიულ ლიტერატურას.

🔴 ​​ვუსმენ​ ელექტრონულ მუსიკას, ზოგიერთი ქვეგანხრის გამოკლებით; ასევე – ჯაზს და მიყვარს კლასიკური მუსიკის მოსმენა ცოცხალი შესრულებით.​

​​ვუყურებ​ ​ფილმებს, რომელიც იმ დროის განწყობას შეესაბამება. მომწონს კინოფესტივალებზე გამოტანილი არაჰოლივუდური ფილმები.

🔺​​მიყვარს​ კონტრასტები – მოკლე პერიოდში გარემოების სწრაფი ცვლა.​

⚪ ​​მაინტერესებს ყველაფერი დედამიწის ზურგზე და მიწის ქვეშ, მგონი, კიდევ უფრო.

​​ვერთობი ​ქალაქგარეთ გასვლით, მეგობრებთან ურთიერთობით და „წმ. პარასკევობით“.

🔸მინდა,​ საქართველოში შემოვიდეს ბევრი თანამედროვე ცოდნა და ახალგაზრდებს და „ძველგაზრდებს“ ხელი მიგვიწვდებოდეს განვითარების ამ ხელსაწყოზე; მინდა თავებში საბჭოთა კავშირის ნგრევა; მინდა Cards Against Humanity-ის თამაში.

🔴 შევცვლიდი ​საქართველოს დედაქალაქს.

🔷​​ჩემი პროფესია არის​ იმის გამოძიება, თუ როდის და როგორ​ წარმოიქმნება მთები და ამ პროცესში რა გავლენას ახდენს ჩვენზე მეწყრების,მიწისძვრების, მდინარეების, კლიმატის ცვლილებისა და სხვა გამოვლინებებით.

თინა ოსაძე

ილიას სახელმწიფო უნივერსიტეტის მეცნიერებათა და ხელოვნების ფაკულტეტის IV კურსის სტუდენტი კულტურის მენეჯმენტის მიმართულებით.

🔶 ვკითხულობ ყოველთვის, საჭიროებებიდან გამომდინარე, ძირითადად, ლიტერატურას ხელოვნებისა და მარკეტინგის შესახებ. ბოლო პერიოდში ძალიან დავინტერესდი სოციალური თემატიკითა და გენდერის თეორიებით.

🔴ვუსმენ განურჩევლად ყველაფერს, განწყობის შესაბამისად. მუშაობის პროცესში განსაკუთრებულად მეხმარება მუსიკა.

◾ ვუყურებ ნებისმიერი ჟანრის ფილმს, მაგრამ ეს არ ნიშნავს, რომ ყველაფერი მომწონს. საჭიროებიდან გამომდინარე, ამ ეტაპზე ბიოგრაფიულ და დოკუმენტურ ფილმებს უფრო მეტ დროს ვუთმობ.

🔺 მიყვარს სიცოცხლე, ყველაზე მეტად, მთელი თავისი თავისუფლებითა და ადამიანებით, მრავალფეროვნებითა და სიურპრიზებით. კიდევ, საუბარი, ხეტიალი და ნაყინიც მიყვარს.

⚪ მაინტერესებს კულტურის სფეროში მიმდინარე მოვლენები, აღვიქვამ, როგორც ყველაზე კომერციულ სფეროს. ასევე, დაინტერესებული ვარ ინოვაციებისა და ტექნოლოგიების სფეროში არსებული სიახლეებით. ვფიქრობ, ეს უმარტივებს ადამიანს ცხოვრებას და შესაძლებლობას აძლევს, ნებისმიერი იდეა აქციოს რეალობად. სწორედ სამრეწველო ინოვაციების ლაბორატორია (ილიაუნის ფაბლაბი) დამეხმარა ჩემი იდეის რეალობად ქცევაში – შევქმენი აქსესუარების ბრენდი „პოპულუსი“, რომელიც დღეს ბაზარზე საკმაოდ ცნობადი და წარმატებულია.

◾მინდა ადამიანები უფრო სამართლიანები, ინტერესიანები და ყურადღებიანები ვიყოთ ერთმანეთის მიმართ. მინდა, რაც შეიძლება მეტად მოძრავ ადამიანებს ვხედავდე და მჯეროდეს, რომ უმოქმედობით შეწუხებულნი ამოძრავდნენ. ყველაზე მეტად კი მოგზაურობა მინდა.

🔸 შევცვლიდი ადამიანების ნეგატიურ დამოკიდებულებას ერთმანეთისადმი.

🔴 ვურჩევდი ადამიანებს, რაც შეიძლება მეტი იმოძრაონ, ნუ ელოდებიან სხვებს. თვითონ უნდა შეძლონ და ყოველდღიური რუტინა გაიმრავალფეროვნონ. იყვნენ მიზანდასახულები და შრომისმოყვარენი.

🔷 ჩემი პროფესია ჩემთვის არ არის კონკრეტული პროფესია, ე.წ. ვიწრო სპეციალობა. კულტურის მენეჯმენტი „მართვის ხელოვნების“ პრინციპებისა და მეთოდების ერთობლიობაა, რომელსაც კულტურის სფეროში ისეთივე დანიშნულება აქვს, როგორიც წარმოების ან საორგანიზაციო სფეროს ნებისმიერ დარგში. ილიაუნიში „კულტურის მენეჯმენტის“ საბაკალავრო პროგრამაზე სწავლა მეხმარება, მივიღო საბაზისო ცოდნა ამ სფეროში და გამოვიმუშაო ის უნარები, რაც სამომავლოდ კარიერული განვითარებისთვის დამეხმარება.

ბარბარა ბარლიანი

ილიაუნის მეცნიერებათა და ხელოვნების ფაკულტეტის IV კურსის სტუდენტი ფილოსოფიის მიმართულებით.

🔶ვუსმენ ძირითადად ელექტრონულ მუსიკას, კერძოდ ემბიენტს. იქიდან გამომდინარე, რომ ავირჩიე ილიაუნის სალექციო კურსი ელექტროაკუსტიკური მუსიკის მიმართულებით, მიწევს შეხება ერთ-ერთ პროგრამასთან, რომელშიც შეგიძლია თავადვე აკეთო მუსიკა. ამდენად, ორმაგად საინტერესო, ინკლუზიური და რეფლექსურია ამ მუსიკასთან დაკავშირებული ცოდნის მიღება.

◾ვკითხულობ, ძირითადად, ფილოსოფიურ ლიტერატურას, ვინაიდან ჩემი პროფესია მოითხოვს სწავლის პროცესში ამას, თუმცაღა, ერთ-ერთი ძირითადი საკითხავი ფემინისტური ლიტერატურა და გენდერის თეორიებია მაშინ, თუკი სემესტრული გამოცდებისთვის არ ვემზადები.

🔺ვუყურებ თითქმის ყველაფერს და ვცდილობ, არ ჩამოვრჩე კინემატოგრაფის სიახლეებს, თუმცა, პირველ ადგილზე ევროპულ კინოს ვაყენებ. სხვათა შორის, ახლახან აღმოვაჩინე ქსავიერ დოლანი – ახალგაზრდა კანადელი რეჟისორი,  რომელსაც, ჩემი აზრით, წარმატების დიდი პოტენციალი აქვს. ბოლო ფილმი კი, რომელიც დიდი სიამოვნებით ვნახე, იყო ჯიმ ჯარმუშის “Paterson”.

⚪მიყვარს ადამიანებთან კომუნიკაცია. ბოლო დროს ვხვდები, რამდენად მახარებს მათთან ურთიერთობა და საერთო ინტერესების გაზიარება თუ განსხვავებულის აღმოჩენა.

◾მაინტერესებს ზუსტი მეცნიერებები, უფრო ზუსტად, ქიმია. დღემდე ვნანობ, რომ მთავარ პროფესიად ის არ ავირჩიე. თუმცა, თუ ყველაფერი გეგმის მიხედვით წავიდა, აუცილებლად მივუბრუნდები ამ მიმართულებას. რაც შეეხება ახალ ინტერესს: როგორც ზემოთ აღვნიშნე, ელექტროაკუსტიკური მუსიკა და მისი ტექნოლოგიებია ის, რასაც აუცილებლად შევისწავლი პროფესიულ თუ არა, სამოყვარულო დონეზე მაინც.

🔸მინდა, რომ ახალგაზრდებს აინტერესებდეთ პოლიტიკური და სოციალური პრობლემატიკა. რაც ყველაზე მეტად სჭირდება ახალგაზრდა ადამიანს, არის სამოქალაქო, პოლიტიკური ცნობიერება და მის გარშემო შექმნილ ვითარებაში სასიკეთო წვლილის შეტანა; განათლების, ეკონომიკის, გენდერის, სექსუალური უმცირესობებისა და სხვა საკითხებისადმი მგრძნობელობა.

🔴შევცვლიდი… ეს გრამატიკული ფორმა თავის თავში მოქმედების შესრულების შეუძლებლობას მოიცავს, რაც ყოფასთან არარელევანტურია, ამიტომ ალბათ კი არა, ვერაფერს შევცვლიდი საოცნებო პერსპექტივიდან. თუმცაღა, მომავალში ბევრი რამის შეცვლა შეიძლება ისევ ჩვენი სოციალური ყოფის გაუმჯობესების მიზნით.

🔷ადამიანებს ვურჩევდი იმას, რაც მე მაკლია; ვურჩევდი, იყვნენ მიზანდასახულები და შრომისმოყვარეები, რაც უნდა დილემად ჟღერდეს ეს. მეორე მხრივ, ნამდვილად რთულია მიზნების განხორციელება ისეთ ქვეყანაში, რომლის ეკონომიკა ძალიან დაბალ საფეხურზეა.

🔶ჩემი პროფესია იქნება ფილოსოფია, როცა ბაკალავრის დიპლომს გადმომცემენ, თუმცა იმედი მაქვს, იმ სურვილების განხორციელებასაც შევძლებ, რაზეც ზემოთ ვისაუბრე.

თინათინ ბლადაძე

ილიაუნის მეცნიერებათა და ხელოვნების ფაკულტეტის მაგისტრანტი კლინიკური ფსიქოლოგიის მიმართულებით.

🔶ვკითხულობ ხშირად და ბევრს, ყოველთვის, როცა დრო მაქვს. არ ვკითხულობ რომელიმე ჟანრს გამორჩეულად, ვფიქრობ, ეს მზღუდავს. თავისუფლებას ვირჩევ – ვკითხულობ იმას, რაც მომწონს.

◾ვუსმენ უფრო მეტად ადამიანებს, ვიდრე მუსიკას, და როცა მუსიკას ვუსმენ, ტექსტის ნაცვლად ემოციები „ისმინება“. კონკრეტულად არცერთი ჟანრის მუსიკის მიმდევარი არ ვარ და, რასაც ვუსმენ, დამოკიდებულია განწყობაზე.

🔺ვუყურებ სამეცნიერო ფანტასტიკას, დრამას… დიდად არც აქ ვიზღუდავ თავს.

⚪მიყვარს სწავლა და ახალი გამოცდილებების მიღება; მიყვარს ჩემი ჰობი, რომელიც ხის ხელნაკეთი ნივთების შექმნას უკავშირდება, და ილიაუნი, რომელმაც მასწავლა აზროვნება და თავისუფლების მნიშვნელობა.

🔷მაინტერესებს ინოვაციებისა და ტექნოლოგიების სფერო. ეს ის გარემოა, რომელშიც თავს კარგად ვგრძნობ. მიმაჩნია, რომ ეს მომავალია. აქ შეგვიძლია, ვაქციოთ გარემო უკეთესად და შევქნათ ახალი ადამიანებზე უფრო მეტად მორგებული სამყარო. ეს არის სფერო, სადაც შემიძლია საკუთარი პროფესია სხვა კუთხით დავინახო და გამოვიყენო.

🔸მინდა ვიყო წარმატებული, მივაღწიო მიზნებს და შევქმნა რაღაც ისეთი, რაც ჯერ არავის შეუქმნია.

◾შევცვლიდი არაფერს, რადგან ვფიქრობ, რომ ასეც საინტერესოა.

🔶თანატოლებს ვურჩევ, დააფასონ გვერდით მდგომი ადამიანები; არ დაკარგონ დრო და გამოიყენონ ყველა შესაძლებლობა, რათა მიიღონ მეტი გამოცდილება და განვითარდნენ. განვითარების რთულ გზაზე არსებული ბევრი სირთულის მიუხედავად, არ უნდა დანებდნენ და მტკიცედ იარონ წინ, რადან ეს არის გზა, რომელიც ერთ დღეს აუცილებლად მიგვიყვანს წარმატებამდე.

🔴ჩემი პროფესია არის ის, რაც მთლიანად ჩემია და ჩემშია. ფსიქოლოგია ყველაზე მეტად ადამიანური და ადამიანზე მორგებული პროფესიაა. ეს შესაძლებლობაა, აქციო ადამიანების ცხოვრება უკეთესად, დაეხმარო და მოარგო გარემოს ადამიანი და ადამიანს – გარემო. სულ მინდოდა, შემექმნა ჩემს პროფესიაში რაღაც ახალი, საინტერესო და ღირებული; ჩემი პროფესია ინოვაციების სფეროსთან დამეკავშირებინა. ამიტომაც, შევქმენი „ლოგიკუმი“ – სათამაშო, რომელიც ბავშვისთვის სასიამოვნოცაა და სასარგებლოც… ეს ჩემი პროფესიული ცოდნის გამოყენებაა ჩემებურ პრაქტიკაში. აქ საუბარია თამაშით ქცევების დასწავლის პროცესის ხელშეწყობაზე, რაც თან სახალისო პროცესია და თან ხელს უწყობს ბავშვის ლოგიკური აზროვნების განვითარებას. ეს ყველაფერი დაიწყო ილიაუნიში. მიღებულმა ცოდნამ და გამოცდილებამ მომცა შესაძლებლობა, დამენახა, რა გვჭირდებოდა და გვინდოდა, რომ გვქონოდა, მაგრამ არ გვქონდა.

ელენე მიდელაშვილი

ილიას სახელმწიფო უნივერსიტეტის საბუნებისმეტყველო მეცნიერებებისა და საინჟინრო ფაკულტეტის მაგისტრანტი ასტროფიზიკის მიმართულებით

🔶ვკითხულობ ბევრს. ბავშვობიდან ძალიან მიყვარს კითხვა. ვკითხულობ ყოველდღე, სხვადასხვა ჟანრს, პოეზიიდან – სამეცნიერო პუბლიკაციების ჩათვლით.

◾ვუსმენ განწყობის მიხედვით. ხანდახან განწყობა განაპირობებს მუსიკის შერჩევას, ზოგჯერ კი ისეთ მუსიკას ვირჩევ, რომელიც განწყობას შემიცვლის. დღეში რამდენჯერმე შეიძლება შევიცვალო ჟანრი, თუმცა ყველაზე ძლიერ კლასიკური მუსიკა მიყვარს, ყველაზე მეტად მოქმედებს ჩემზე.

⚪ მიყვარს ადამიანებთან ურთიერთობა. მაინტერესებს ადამიანი და ამან განაპირობა ფსიქოლოგიის, ჩემი მეორადი პროფესიის არჩევა. განსაკუთრებით მიყვარს ბავშვები, მათთან თამაში და საუბარი.

🔷 მაინტერესებს სამყარო. ამიტომ დავიწყე ფიზიკის შესწავლა, ასტროფიზიკამ ჩემს ცხოვრებაში ყველაზე დიდი ადგილი დაიკავა. ადამიანები ამ ერთი პატარა პლანეტიდან ვაკვირდებით და ვცდილობთ, შევიცნოთ სამყარო; მათემატიკური გამოთვლებით ვიგებთ, როგორია ჩვენგან მილიონობით სინათლის წლით დაშორებული ობიექტების თვისებები. ეს განსაკუთრებულ ემოციას იწვევს ჩემში. ამჟამად ჩემს ხელმძღვანელთან, გია მაჩაბელთან, ერთად ვიკვლევ მაღალი სიხშირის გამოსხივებას ნეიტრონულ ვარსკვლავებში.

🔺მინდა საქართველოში მეცნიერება დაფასდეს და სათანადოდ მოწესრიგდეს განათლების სისტემა.

🔸 შევცვლიდი საზოგადოებას მეტი კეთილგანწყობისკენ, მეტი პოზიტივისა და მშვიდობისკენ….

◾ჩემს თანატოლებს ვურჩევდი, პროფესიად აირჩიონ ის საქმე, რის კეთებაც მთელი ცხოვრება გააბედნიერებთ.

🔴ჩემი პროფესია არის ის, რის გარეშეც ვერ წარმომიდგენია ჩემი მომავალი. ჩემი პროფესია ჩემი ჰობია.

 

მიხა კეკელია

ილიას სახელმწიფო უნივერსიტეტის საბუნებისმეტყველო მეცნიერებებისა და საინჟინრო ფაკულტეტის მაგისტრანტი ეკოლოგიის მიმართულებით, ილიაუნიში სტუდენტური კლუბის (Iliauni HikingClub) ერთ-ერთი დამფუძნებელი

🔶ვკითხულობ იმას, რითიც ვინტერესდები.

ვუსმენ  ყველაფერს,  რაც სიამოვნებას მანიჭებს. ადრე, უმეტესწილად როკს ვუსმენდი, მაგრამ ეს ხელს საერთოდ არ მიშლიდა, რომ სხვა ჟანრებისთვისაც მომესმინა.

🔷ვუყურებ ყველაფერს, რაც ჩემში ინტერესს აღძრავს. გამოცდილებაზე დაკვირვებით შემიძლია ვთქვა, რომ არაჰოლივუდური ფილმები უფრო მაინტერესებს, თუმცა ჰოლივუდურსაც დიდი სიამოვნებით ვუყურებ.

🔺მაინტერესებს ძალიან ბევრი რამ, რის შესწავლასაც ვისურვებდი, რომ არა დროის სიმცირე. ყოველთვის ვცდილობ, არ შევიზღუდო თავი, რის გამოც დროდადრო ინტერესები სხვადასხვა მიმართულებით მეზრდება. ჩემი ერთ-ერთი ყველაზე დიდი გატაცება ლაშქრობებში სიარულია. ჩემმა მეგობრებმა და მე ჩამოვაყალიბეთ  Iliauni Hiking Club – კლუბის სახით შევქმენით სივრცე, სადაც ლაშქრობებით დაინტერესებულ ადამიანებს შეუძლიათ, გაიცნონ ერთმანეთი; მიიღონ საბაზისო ცოდნა ლაშქრობების შესახებ და გამოიმუშაონ ის უნარები, რაც გამოადგებათ სამომავლო ლაშქრობებისთვის. პირადად ჩემთვის ყველაზე დიდი შენაძენი, რაც კლუბმა შემმატა, იმ ადამიანთა სიმრავლეა, რომლებთანაც ძალიან კარგი მოგონებები და დღემდე ძალიან ახლო ურთიერთობა მაკავშირებს. ზოგადად, სიახლეების აღმოჩენა და „თავგადასავლები“ – როგორც პირდაპირი, ისე გადატანითი მნიშვნელობით, ჩემში განსაკუთრებულ ინტერესს აღძრავს.

🔸მინდა,  რომ მომავალი თაობები მენტალურად აღარ იყვნენ წინა თაობების სრული ანარეკლები.

სტუდენტებს ვურჩევდი, არ იყვნენ კატეგორიული აზროვნების. იყავით გამბედავები და ყოველთვის თავისუფლად გამოხატეთ საკუთარი აზრი, იმის მიუხედავად, იზიარებენ თუ არა თქვენს მოსაზრებას ოჯახის უახლოესი წევრები თუ საზოგადოებრივი ჯგუფები.

მეგი გამტკიცულაშვილი

ილიას სახელმწიფო უნივერსიტეტის საბუნებისმეტყველო მეცნიერებებისა და საინჟინრო ფაკულტეტის მესამე კურსის სტუდენტი ეკოლოგიის მიმართულებით.

ამჟამად, Erasmus+ გაცვლითი პროგრამის ფარგლებში, სწავლობს სალონიკის (საბერძნეთი) არისტოტელეს უნივერსიტეტში.

🔶 ვკითხულობ, ძირითადად, ფოლოსოფიურსა და დეტექტიურ ნაწარმოებებს. ასევე, სამეცნიერო სტატიებს.
 
ვუსმენ ყველანაირი ჟანრის მუსიკას, განწყობის შესაბამისად.
 
🔷ვფიქრობ, რამდენად უკეთესი იქნებოდა სამყარო, თითოეულმა ჩვენგანმა სულ მცირე სიკეთე რომ გააკეთოს ყოველდღე.
 
🔺 მიყვარს მოგზაურობა, თავგადასავლები და მარციპანი შოკოლადით.
 
🔸მინდა, საქართველო უფრო სუფთა და მწვანე ქვეყანა იყოს, მეტი სამოქალაქო პასუხისმგებლობის მქონე საზოგადოებით, ნაკლები ბრაკონიერითა და ნარჩენების მოწესრიგებული დახარისხება-გადამუშავების სისტემით.
 
როცა დავბრუნდები, სწავლის გაგრძელებასთან ერთად, ვაპირებ მუშაობის გაგრძელებას კავკასიის გარემოსდაცვითი არასამთავრობო ორგანიზაციების ქსელში (CENN). ძირითადად, ახალგაზრდებთან ვმუშაობ გარემოს დაცვასთან დაკავშირებულ საკითხებზე. აქ მიღებულ ცოდნას აქტიურად გამოვიყენებ როგორც უნივერსიტეტში, ისე სამსახურში.
 
🔴 სტუდენტებს ვურჩევ, გამოიყენონ ყველა შესაძლებლობა საკუთარი განვითარებისათვის. ვისურვებდი, რომ ყველა ახალგაზრდას მიეცეს საზღვარგარეთ სწავლის ან მუშაობის შესაძლებლობა. პროფესიულს რომ თავი დავანებოთ, ეს საუკეთესო საშუალებაა პიროვნული განვითარებისთვის.
 
🔷 ილიაუნი არის უნივერსიტეტი, რომელშიც ყველაზე მეტად ვაფასებ მის სამ ძირითად პრინციპს: აკადემიურ, სინდისის და არჩევანის თავისუფლებას. გარდა ამისა, კვალიფიციური ლექტორები, სწავლების თანამედროვე მეთოდები და სტუდენტის კეთილდღეობაზე მორგებული სისტემა ძალიან საინტერესოს ხდის ამ უნივერსიტეტს ჩემთვის.

ანი რაინაული

ილიაუნის მეცნიერებათა და ხელოვნების ფაკულტეტის მაგისტრანტი კლინიკური ფსიქოლოგიის მიმართულებით

ამჟამად, Erasmus+ გაცვლითი პროგრამის ფარგლებში, სწავლობს ტურკუს (ფინეთი) უნივერსიტეტში.

🔶 ვკითხულობ იმას, რაც ჩემში გამოიწვევს შთაგონებას და მრავალფეროვან/განსხვავებულ ემოციებს.

◾ვუსმენ  ნებისმიერ მუსიკას, რაც ჩემზე ემოციურად იმოქმედებს.

🔷 მიყვარს სიმღერა, წერა, მოსმენა – როგორც მუსიკის, ისე ადამიანების.

🔺 საქართველოში დაბრუნების შემდეგ, ახალი ძალებით შევუტევ ჩემს კარიერულ წინსვლას და სიამოვნებით გავუზიარებ სხვებს ჩემს გამოცდილებას.

▪ ჩემი პროფესია: ფსიქოლოგიამდე ადამიანების მიმართ ინტერესმა მიმიყვანა. ყოველთვის შეიძლება რაღაც განსხვავებული იპოვო პიროვნებაში.

🔴 სტუდენტებს ვურჩევ, იყვნენ შემოქმედებითები და არ შეეშინდეთ რისკის. გიჟური იდეებიც კი შეიძლება საინტერესო რეალობად იქცეს.

 

მარიამ ყეინაშვილი

ილიას სახელმწიფო უნივერსიტეტის მეცნიერებათა და ხელოვნების ფაკულტეტის IV კურსის სტუდენტი ლიტერატურათმცოდნეობის მიმართულებით

ამჟამად, Erasmus+ გაცვლითი პროგრამის ფარგლებში, სწავლობს გრონინგენის (ნიდერლანდები) უნივერსიტეტში.

◾რატომ ჩემი პროფესია: თავიდანვე მსურდა, კითხვა გამეხადა პროფესიად, ამიტომაც, ლიტერატურათმცოდნეობა ავირჩიე. ვსწავლობ ლიტერატურის თეორიებს, ეპოქებს, მიმდინარეობებს, ზოგადად მწერლობას, როგორც მედიასაშუალებას ანტიკურობიდან დღემდე; ლექციებზე ვეხებით სემიოტიკასა და ლინგვისტიკას. ასევე, ვსწავლობ ციფრულ კომუნიკაციას, რაც მეორე ინტერესის სფეროში – გრაფიკულ დიზაინში – მიღრმავებს ცოდნას. ეს სფერო მოიცავს ადამიანების ურთიერთობას ვირტუალურ სივრცესთან და სივრცეში.

🔶 ვკითხულობ ჰერბერტ უელსის „დროის მანქანას“.

ვუსმენ მუსიკას განწყობის მიხედვით, ჟანრობრივი შეზღუდვა არ მაქვს.

🔺 ვფიქრობ და მაწუხებს მსოფლიოში მიმდინარე პროცესები, სიყალბე, უმოქმედობის შეგრძნება, დღითიდღე მზარდი ბოროტება და, ვფიქრობ, რა შეიძლება უშველოს ერთმა ადამიანმა მრავლის მიერ დაშვებულ შეცდომებს.

მიყვარს ადამიანები და ჩემი საქმე.

🔷საქართველოში დაბრუნების შემდეგ სწავლას და მუშაობას აღნიშნულ სფეროებში გავაგრძელებ. გეგმაში მაქვს ორივე მათგანის კომბინირება. ლიტერატურათმცოდნეობა უსაზღვრო და თავისუფალი სფეროა, მოიცავს ყველანაირი მიმართულების ტექსტებს: ფილოსოფიურს, თეოლოგიურს, მხატვრულს… ის თავს არ გახვევს საკუთარ კანონებსა და წესებს, თუ როგორ უნდა წაიკითხო ესა თუ ის ტექსტი. არ არსებობს კანონი გააზრებისთვის; ლიტერატურა ქმნის უსაზღვროდ დიდ სივრცეს ინდივიდში. ლიტერატურას ახასიათებს დამოკიდებულება, დამოკიდებულება იდეებზე, თუმცა ის პატიმრად კი არ გაქცევს, არამედ გაძლევს საშუალებას, გადასინჯო ეს იდეები, ერთმანეთს დაუპირისპირო ან დაუკავშირო და ჩამოაყალიბო საკუთარი ხედვა; შენში აღმოაჩინო და შეამჩნიო ის, რაც უკვე არსებობს. გრაფიკული დიზაინით გატაცება კი შემოქმედების სურვილია. მგონია, რომ შემოქმედება ადამიანებისთვის სასიცოცხლოდ მნიშვნელოვანია. მე ხატვის პროცესი მსიამოვნებს, მსიამოვნებს სხვადასხვა ხასიათის გადატანა ილუსტრაციაში; ფერები და ფორმები დიდ ზეგავლენას ახდენს ჩემზე, თუმცა, მიმაჩნია, რომ ეს სფეროც ისევე მათავისუფლებს, როგორც ლიტერატურა.

სტუდენტებს ვურჩევ აკეთონ ის საქმე, რომელიც უყვართ. ძალიან მნიშვნელოვანია შეგრძნება, რომ გათავისუფლებს ის, რასაც აკეთებ.

🔶 ილიაუნი არის უნივერსიტეტი, რომელიც დიდ შესაძლებლობას აძლევს ახალგაზრდებს, მიიღონ ახალი გამოცდილება, რომელიც მხოლოდ მომავლის ან კარიერის დაგეგმვაში კი არ დაეხმარება მათ, არამედ პიროვნულ ფორმაციაშიც შეუწყობს ხელს. გარდა ამისა, ილიაუნი მუდმივად მუშაობს აკადემიური სივრცის განვითარებაზე, აწყობს უამრავ ღია პროექტსა და საჯარო ლექციას; მასპინძლობს ცნობილ პროფესორ-მასწავლებლებს საქართველოში და უცხო ქვეყნებიდან; სტუდენტებს სთავაზობს ისეთ საინტერესო პროგრამებს, როგორიცაა, მაგალითად, ამერიკული პროგრამა Liberal Arts. ERASMUS + გაცვლითი პროგრამის შესახებაც ილიას სახელმწიფო უნივერსიტეტში შევიტყვე და ამჟამად ნიდერლანდებში ვსწავლობ.